DILI, 15 abríl 2024 (TATOLI)—Deputadu husi bankada CNRT iha Parlamentu Nasionál (PN), Duarte Nunes ho Deputadu KHUNTO, Luis Roberto, husu Autoridade Rejiaun Administrativa Espesiál Oé-Cusse Ambeno (RAEOA) atu investiga kle’an kona-ba aviaun ZEESM ne’ebé deskonfia iha iregularidade ne’ebé daudaun ne´e sai polémika iha públiku.
Notísia Relevante: Rogério Lobato preokupa despeza no reseita husi operasaun aviaun ZEESM
Deputadu CNRT, Duarte Nunes, husu atu abrevigua hodi buka hatene kona-ba kestaun ne’e ninia realidade ne´e iha ka lae.
“Kona-ba relatóriu Kámara Konta, ezekusaun ba RAEOA, ita labele ho ida-ne’e taka kazu ruma karik mosu. Hanesan foin daudaun iha mídia, iha problema ho aviaun, entaun ita presiza abrevigua buka hatene, realidade iha ka lae,” nia hato’o liuhusi reuniaun plenária iha ámbitu ba apresiasaun no diskusaun relatóriu no paréser relativa ho relatóriu ezekusaun orsamentál trimestre da-haat tinan finanseiru 2023, segunda ne’e.
Nia sujere ba RAEOA atu hetan relatóriu kredível karik buka auditória internasionál hodi haree, tanba dalaruma saida mak ema balun lahatene iha ne’eba.
“Ita presiza halo auditória kredível ba instituisaun sira halo, dadus sira-ne’e ita bele entrega fali ba auditória ida atu verifika ba haree fali, hodi ita labele sai husi situasaun ida grupu ida simu no ida la simu. Ida-ne’e laiha benefísiu ba Estadu, ida-ne’e povu nia osan no buat hotu tenke hatene,” nia dehan.
Deputadu KHUNTO, Luis Roberto, iha ninia observasaun haktuir katak agora viral iha Timor laran, kona-ba problema aviaun ida iha RAEOA, ida-ne´e presiza duni klarifika loloos hodi povu bele hatene.
“Aviaun mai Timor momentu ne’eba sosa ka empresta de’it, ita presiza hatene didi’ak. Povu sira iha kraik konfuzaun boot. Ne’ebé, ita reprezentante povu iha ne’e hanoin presiza klarifikasaun duni tanba orsamentu ne’ebé ita halo ba kontratu saida de’it osan ne’e povu nian,” nia dehan.
Deputadu FRETILIN, Antoninho Bianco, hanoin Kámara Konta halo ona auditória ba RAEOA, inklui aviaun ne’e rasik, depois tenke hatete tanba dalaruma uza mídia maibé tenke hateten Kámara Konta ne’e reprezenta Estadu ne’ebé harii atu halo servisu sira.
Ministra Finansa, Santina Cardoso, hateten kona-ba aviaun ba auditória husi kamára konta hala’o tuir nia kompeténsia ne’ebé iha, nune;e labele fó komentáriu.
Maibé, governante ne’e hato’o katak durante ne’e Kámara Konta parseira di’ak ho Ministériu Finansa, bainhira iha auditória sira-ne’ebé la’o emite rekomendasaun sira atu bele implementa.
Notísia Relevante: Aero Dili troka aviaun ZEESM semo bá Oé-cusse
Jornalista : Nelson de Sousa
Editór : Cancio Ximenes
