VIQUEQUE, 15 abríl 2024 (TATOLI)—Ekipa husi Sekretaria Estadu Pekuária (SEP) hamutuk ho Servisu Agrikultura munisípiu Viqueque, segunda ne’e, introdús moras rabies (raiva) ba abitante suku Uma-ki’ik, postu Viqueque Vila, munisípiu Viqueque.
“Ohin ekipa Sekretaria Estadu Pekuária sosailiza moras rabies ba Autoridade munisípiu Viqueque, líder komunitária no abitante sira. Agora ita tenke atensaun ba moras ne’ebé daudaun ne’e invade ona iha Timor-Leste, foin lalais iha fulan-marsu ema ida maka mate,” Sekretáriu Estadu Pekuária, José Viera de Araújo, hateten hafoin atividade sosializasaun, iha suku Uma-ki’ik.
Notísia relevante : MS distribui HRIG bá RAEOA no HNGV prevene rabies
Ekipa SEP halo sosializasaun no fahe brusura ba abitante lokál sira hodi divulga informasaun kona-ba prevensaun moras ne’e.
“Tanba moras rabies ne’e mai husi animál sira hanesan asu, busa, lekirauk, no niki ne’ebé koñesidu asu bulak. Governu Austrália maka apoiu ai-moruk prevensaun hamutuk 200 mil, maibé ita simu 50 mil hodi fó vasina ba animál sira-ne’ebé ita hakiak,” nia akresenta.
Ekipa vasinasaun fó ona vasina ba animál iha Dili, Covalima no Rejiaun Administrativa Espesiál Oé-cusse Ambeno (RAEOA) no daudaun halo hela sosializasaun ba munisípiu sira hodi fó vasina.
“Desaminasaun informasaun ba abitante sira importante atu ita hamutuk hodi halo prevensaun no mitigasaun. Nune’e ai-moruk prevensaun ne’ebé doadór sira lori to’o Timor Leste hahú halo vasina ba animál sira iha munisípiu sira-ne’ebé maka seidauk halo vasina,” nia realsa.
Jornalista : Vitorino Lopes da Costa
Editora : Julia Chatarina
