DILI, 15 abril 2024 (TATOLI)–Ministériu Saúde (MS) oras ne’e distribui ona vials ka botir (frascos para injetáveis) 20 Human rabies immune globulin (HRIG) bá Ospital Referensia Rejiaun Administrativa Oé-Cusse Ambeno (RAEOA)no vials 5 ba Ospital Nasionál Guido Valadares (HNGV) hodi prevene moras raiva ka rabies.
Portavóz Ekipa Integradu Saúde iha Ministériu Saúde, Vidal de Jesus Lopes hateten HRIG ne’ebé distribui ona ba HNGV no Ospitál RAEOA ne’e tanba hetan doasaun maihosi Governu Austrália.
Notísia Relevante:MS kria ekipa atu kombate virus Rabies iha Timor-Leste
Nia dehan, Human rabies immune globulin (HRIG) to’o iha Timor-Leste iha semana hirak liubá no entrega ba iha Institutu Nasionál Farmásia no Produtu Medikamentu.
“Human Imunoglobuline Rabies ne’ebé sira ajuda ho kuantidade 25 vials ne’ebé 20 bá Oé-Cusse no 5 vials ba HNGV,” nia relata ba TATOLI via WhatShapp.
Tuir nia funsaun hosi RHIG ne’e maka atu evita transmisaun virus iha ema nia isin lolon bainhira hetan tata husi asu ne’ebé infetadu ho virus rabies ka raiva.
Entertantu, tuir dadus komulativu husi Institutu Nasionál Saúde Públika Timor-Leste asu tata ema hamutuk 64 iha RAEOA iha Pasabe no Oesilo.
Notísia Relevante:Vítima 29 ne´ebé asu tata iha Pasabe-Oésilo simu ona vasina Rabies
Jornalista: Jesuína Xavier
Editor: Agapito dos Santos
