BOBONARO, 15 abríl 2024 (TATOLI)-Diresaun Servisu Munisipál Agrikultura Bobonaro, liuhosi Programa Dezenvolvimentu Integradu Muisipál (PDIM) tinan 2024 sei konstrui irigasaun iha aréa Raegeren-Raboanan, suku Raifun, postu adiministrativu Maliana munisípiu Bobonaro hodi fornese bee ba natar ektáres 56.
Diretór Servisu Munisipál Agrikultura Bobonaro, Longuinhos João hateten prosesu aprovizionamentu remata ona maibé seidauk bele implementa projetu ne’e iha tempu badak tanba sei hein hela agrikultór sira daudaun ne’e sei halo natar epóka dahuluk nian ba tinan 2024.
Notísia Relevante:Projetu irrigasaun Maliana II iha ona prosesu konkursu públiku
“Ita presiza tan tempu uainhira ita-nia agrikultór sira koa tia hare foin bele hahú nia obra ne’e,” nia informa asuntu ne’e, ba Jornalista sira, iha edifísiu administrasaun autoridade munisipál Bobonaro, segunda ne’e.
Tuir-nia projetu konstrusaun irigasaun foun ne’e ho ninia distánsia killo-metru tolu hodi fornese bee ba natár ektáres 56 no benefísia agrikultór uma-kain 58 ne’ebé maka durante ne’e halo natar no toos iha fatin ne’ebá, tanba irigasaun ne’e sei foti bee hosi husi Mota-Bulobu Irigasaun Maliana I.
“Ita tenke agradese tanba governu responde emidiata nesesidade toos na’in sira ninia objetivu mak ne’e kuandu iha ona irigasaun di’ak, primeiru rai abandonadu sei laiha, segundu ita-nia agrikultór sira bele kuda tinan ida dala rua tanba baibain bee la sufisinete sira kuda epóka dahuluk de’it ne’ebé ita espera ho obra ne’e ita-nia agrikultór sira labele abandona rai hotu-hotu tenke bo’ok aan atu nune’e ita bele to’o objetivu finál hasa’e produsaun rai-laran,” nia hateten.
Projetu konstrusaun irigasaun Raegeren-Raboanan, iha suku Raifun liuhosi Programa Dezenvolvimentu Integradu Muisipál (PDIM) ho totál kustu orsamentu estimativu $ 110,000.00.
Notísia Relevante:Natar ektare rihun 13-resin iha Maliana abandona
Jornalista: Sergio da Cruz
Editór: Agapito dos Santos
