iklan

EKONOMIA

CCI-TL relata progresu serbisu ba Xefe Estadu

CCI-TL relata progresu serbisu ba Xefe Estadu

DILI, 16 abríl 2024 (TATOLI) – Prezidente Kámara Komérsiu Indústria – Timor-Leste (CCI-TL-sigla portugés), Jorge Serano ho estrutura hamutuk ho emprezáriu timoroan sira relata progresu serbisu ne’ebé setór privadu sira durante ne’e halo ba Xefe Estadu, José Ramos Horta.

“Prezidente Repúblika mak bolu ami mai fulan tolu dala ida. Ami mai atu relata progresu serbisu saida mak setór privadu halo ona hodi kontribui ba dezenvolvimentu nasaun nian,” Jorge hatete ba jornalista sira iha Palásiu Prezidensiál Bairru-Pite Dili, tersa ne’e.

Nia dehan, durante hasoru malu setór privadu sira hato’o mós ba Prezidente Repúblika relasiona ho progresu ekonomia, ligasaun setór privadu nian ba Organizasaun Mundiál Komersiu (OMK), ASEAN no CPLP.

“Ami ko’alia la sees husi kontextu Timor-Leste nian ne’ebé ita hotu preokupa hakarak hadi’a ita nia nasaun ne’e hodi kontribui ba fó empregu, motiva investimentu, hasa’e produsaun rai-laran atu hametin sustentabilidade ekonomia iha nasaun ne’e. Ida ne’e mak ami relata ba Prezidente Repúblika,” nia katak.

Progresu husi servisu Demoplot

Vise-Prezidente CCI-TL ne’ebé trata Asuntu agrikola, Rui Castro, hatete, Timor-Leste presiza halo demoplot atu motiva timoroan hotu ne’ebé moris nu’udar agrikultór bele fila hikas ba natar.

“Demoplot ne’e la’o kapas tebes. Ita kuaze kuda hare iha fatin barak ho rezultadu ne’ebé di’ak tebes. 18 abríl agora, ita sei kuda iha fatin haat; Lospalos Luro, Baucau Seiçal ho Viqueque iha Ossu. Maiu nia laran ita sei kolleta iha fatin tolu; Suai, Vemase no Maliana. Iha maiu nia laran ita sei kuda tan iha Munisípiu tolu, komunidade sira kontente no kolabora hodi hala’o atividade ne’e,” Rui Castro hatete.

Demoplot realiza hosi CCI-TL hetan apoiu másimu hosi Banku Nasionál Komérsiu Timor-Leste (BNCTL-sigla portugés) no Heineken.

“Depois demoplot, iha agostu ba oin ita sei la haree tan demoplot, maibé sei haree fali investimentu ida ne’ebé kontinua fali hosi demoplot ne’ebé halo fali husi setór privadu sira ne’ebé apriende fali hosi demoplot. Ne’ebé, iha agostu ba oin setór privadu hotu hakarak investe maka’as iha agrikultura liuliu iha hare nian,” nia katak.

Emprezáriu timoroan ne’e hatutan tan, demoplot programa ida ne’ebé di’ak atu lori setór privadu sira oinsá investe iha agrikultura iha área natar nian.

“Iha agostu ba oin mak investimentu la’o ona iha tinan 2026 ba oin ita-nia produsaun rai-laran sa’e maka’as ona liuliu ita hamenus ona importasaun foos husi rai-li’ur. Ita halo investimentu ba natar ne’e ba de’it Munisípiu ne’ebé poténsia ba natar, ita haala’o tuir de’it saida mak demoplot iha ona ne’e,” nia garante.

CC-TL identifika ona Munisípiu sia ne’ebé poténsia ba natar atu halo investimentu iha fulan-agostu mai ne’e.

“Ita halo ida ne’e hodi redús importasaun foos hosi rai-li’ur tanba kada tinan ita gasta millaun $200 ba sosa foos husi rai-li’ur, entaun ida-ne’e oportunidade ida ba setór privadu atu investe tanba ita identifika ona natar etar rihun 800. Tinan ne’e, ita konsege halo de’it etar rihun 26-resin, entaun tinan oin mai ita investe ba oin la presiza ona importa,” nia konklui.

Jornalista: Hortencio Sanchez

Editór: Rafael Ximenes de A. Belo

 

iklan
iklan

Leave a Reply

iklan
error: Content is protected !!