iklan

HEADLINE, KAPITÁL

Ekipa konjunta sobu barraka 95 okupa espasu públiku iha Bidau

Ekipa konjunta sobu barraka 95 okupa espasu públiku iha Bidau

Ekipa konjunta sobu barraka ne’ebé okupa espasu públiku, iha área Bidau Senggol no Kuluhun, tersa (15/04/2024). Imajen Tatoli/António Daciparu

DILI, 16 abríl 2024 (TATOLI)–Ekipa konjunta ne’ebé lidera husi Sekretaria Estadu Asuntu Toponímia Organizasaun Urbana (SEATOU), tersa ne’e, sobu barraka hamutuk 95 ne’ebé okupa espasu públiku, hahú husi ponte BJ Habibie, Bidau Senggol to’o Kuluhun.

Ekipa ne’e kompostu husi SEATOU, Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL), Ministériu Obra Públika (MOP), Terra no Propriedade, Jestaun Merkadu Munisípiu Dili no entidade relevante seluk tan.

“Atividade ne’e hanesan kontinuasaun de’it, komunidade ne’ebé ohin ita hasai ne’e fó ona notifikasaun antes liuhusi Jestaun munisípiu Dili, hahú husi setembru tinan kotuk to’o janeiru, ita fó notifikasaun dala-rua, mate tiha hasai fali. Foin daudaun hasai tan mós la kumpre, tanba ne’e hakarak ka lakohi ohin ekipa konjunta tun uza lei ne’ebé iha ona, hasai ka sobu komunidade ne’ebé okupa espasu públiku hodi halo negósiu,” Sekretáriu Estadu Asuntu Toponímia Organizasaun Urbana, Germano Santa Brites Dias, hateten, iha Bidau.

Ekipa konjunta ezekuta serbisu bazeia ba dekretu-lei númeru 3/2024 17 janeiru, alterasaun dahuluk dekretu-lei númeru 33/2008 27 agostu, kona-ba ijiene no orden públiku. Nune’e mós, iha dekretu-lei númeru 51/2016 28 dezembru kona-ba lisensiamentu mesajen publisitária, no dekretu-lei númeru 2/2017 22 marsu kona-ba sistema jestaun reziduu sólidu urbanu, inklui dekretu-lei númeru 3/2017 22 marsu kona-ba rejime zona estasionamentu durasaun limitada.

Notísia relevante : SEATOU hakarak transforma sidade iha territóriu sai moos no organizadu

Nune’e, Governante ne’e nafatin husu ba komunidade hotu hodi koopera nafatin ho Governu bainhira simu ona notifikasaun.

Barraka ne’ebé ekipa konjunta sobu maioria kioske, restaurante, bengkel, roupa segunda mão (obralan) no produtu lokál, ne’ebé sira filafali ba sira-nia fatin antes, tanba sira ne’e maioria husi Bidau Santa Ana, Bidau Toko Baru, Bidau Mota Klaran, Metiaut no balun mai husi Fatuhada.

“Fatin ne’e sei husik atu ita-nia Governu bele halo dezenvolvimentu seluk, sira ne’ébé ohin hasai daudaun la desloka ba Merkadu Manleuana no Taibesi maibé sira ne’e dadus iha Jestaun Merkadu munisípiu Dili, ne’ebé aban bain-rua bainhira merkadu di’ak ona mak sei rejista sira, hakarak bá bele bá,” nia tenik.

Daudaun ne’e, ekipa husi munisípiu Dili iha planu atu hadi’a merkadu sira ne’ebé harii iha tempu Indonézia hanesan merkadu Becora Maufelu, merkadu ki’ik ida iha Ponte Benamauk, no merkadu boot Taibesi.

“Sira ne’e sei hadia hotu, nune’e fiar bele akumula hotu ona vendedór sira ne’ebé daudaun kontinua fa’an iha espasu públiku nosei tama hotu ba merkadu laran,” Sekretáriu Estadu salienta.

Merkadu Manleuana rasik sufisiente atu akumula vendedór sira husi Elemloi, Bairru-Pité, no Kampung Baru tanba merkadu referidu Estadu prepara rai ektare rua. Daudaun foin dezenvolve metade husi rai ne’ebé prepara.

Tuir planu, aban ekipa konjuntu sei kontinua sobu barraka iha parte Aitarak-laran Ministériu Finansa oin no Bidau Santa Ana.

Jornalista     : Arminda Fonseca 

Editora          : Julia Chatarina

iklan
iklan

Leave a Reply

iklan
error: Content is protected !!