iklan

HEADLINE, KAPITÁL

Kandidatura 41 admitidu sei kompete ba eleisaun órgaun suku iha 27 abríl

Kandidatura 41 admitidu sei kompete ba eleisaun órgaun suku iha 27 abríl

Ilustrasaun Eleisaun. Imajen/Espesiál

DILI, 16 abríl 2024 (TATOLI)—Ministériu Administrasaun Estatál (MAE) fó sai lista kandidatura admitidu hamutuk 41, kompostu husi mane na’in-39 no feto na’in-rua, sei kompete iha eleisaun órgaun suku.

Sekretariadu Tékniku Administrasaun Eleitorál (STAE) halo ona sinkronizasaun ba dadus eleitór husi munisípiu haat hanesan Dili, Viqueque, Aileu no Manatuto ne’ebé sei ezerse direitu votu ba eleisaun suku 10, nune’e akumula eleitór 33.176.

“Totál kandidatura 41 ne’ebé admitidu atu kompete iha eleisaun suku 10, ne’ebé sei realiza iha loron 27 abríl mak hanesan munisípiu Aileu postu administrativu Aileu Vila, suku Lequitura, totál kandidatura mane na’in-lima, postu administrativu Laulara, suku Bocolelo totál kandidatura mane na’in-rua,” referidu nota ne’ebé Agência Tatoli asesu, tersa ne’e

Munisípiu Dili, postu administrativu Cristo Rei suku Ailok totál kandidatura na’in-lima kompostu husi mane haat no feto ida, postu administrativu Dom Aleixo suku Madohi, totál kandidatura na’in-sia kompostu husi mane ualu no feto ida, suku Manleuana, totál kandidatura mane na’in-haat, suku Bebonuk totál kandidatura mane na’in-neen, postu administrativu Metinaro suku Mantelolaun totál kandidatura mane ida.

Enkuantu, munisípiu Manatuto, postu administrativu Barique, suku Sikone-Diloli, totál kandidatura mane na’in-rua, postu administrativu Laclo, suku Laicore totál kandidatura mane na’in-tolu. Munisípiu Viqueque, postu administrativu Ossu, suku Builo totál kandidatura mane na’in-lima.

Notísia relevante : Eleitór 33.176 husi suku 10 sei partisipa eleisaun iha fulan ne’e

Konsellu Ministru liuhusi sorumutu iha loron 20 marsu 2024, aprova ona projetu dekretu Governu númeru 3/24 25 marsu ne’ebé aprezenta husi Ministru Administrasaun Estatál, Tomas do Rosário Cabral, ne’ebé estebelese data ba realizasaun Asembleia Aldeia no Konsellu Suku iha ámbitu prosedimentu eleisaun líder komunitáriu sira.

Tuir dekretu ne’e realizasaun ba eleisaun suku 10 sei realiza iha loron 27 abríl 2024 no apuramentu ba rezultadu tenke termina iha loron 28 abríl 2024.

Bainhira laiha kandidatu xefe suku ne’ebé maka hetan votu válidu liu metade ne’ebé fó sai, sei realiza filafali votasaun daruak entre kandidatu rua, ne’ebé hetan votu maioria iha loron 13 maiu 2024.

Prosesu konstituisaun meza eleitorál suku no kandidatura ba eleisaun xefe suku no ninia kontensiozu, sei hala’o iha loron 12 abríl 2024. Períodu informasaun públika no edukasaun eleitór kona-ba prosesu eleisaun líder komunitária nian sei hala’o to’o loron 24 abríl 2024.

Iha loron 28 outubru 2023, IX Governu liuhusi STAE realiza ona eleisaun sira, ne’ebé korresponde ba maioria husi suku hotu. Enkuantu, eleisaun iha suku 10 foin mak atu realiza

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!