iklan

HEADLINE, KAPITÁL

Eleitór 33.176 husi suku 10 sei partisipa eleisaun iha fulan ne’e

Eleitór 33.176 husi suku 10 sei partisipa eleisaun iha fulan ne’e

Ilustrasaun ema halo votasaun. Imajen/Espesiál

DILI, 02 abríl 2024 (TATOLI)Sekretariadu Tékniku Administrasaun Eleitorál (STAE) hafoin atualiza dadus eleitór munisípiu haat hanesan Dili, Viqueque, Aileu no Manatutu, akumula númeru eleitór hamutuk 33.176.

“Dadus eleitór antes ne’e 26.000-resin maibé hafoin ita halo sinkronizasaun, rezultadu ikus eleitór ne’ebé sei ezerse sira-nia direitu votu iha 27 abríl hamutuk 33.176,” Diretór Jerál STAE, Elviro Fernandes Moniz, informa ba Agência Tatoli, iha ninia knaar fatin, Caicoli, tersa ne’e.

Orsamentu ne’ebé prepara ba eleisaun suku sanulu iha tinan ne’e, antes ne’e prevee $182.709,50 maibé hafoin haree númeru eleitór aumenta, maka osan sai $276.165.

Notísia relevante : MAE-STAE sei kria mekanizmu fasilita eleitór sira iha eleisaun suku

Aleinde ne’e, prepara mós urna 208 no kabina votu 260.

“Urna sira ne’e ita sei distribui ba kada sentru votasaun iha aldeia sira, rua to’o haat depende ba númeru eleitór nian no kabina votu mós hanesan distribui ba aldeia tuir númeru eleitór, bainhira kiik tau rua, enkuantu boot tau lima,” nia akresent.

Ministériu Administrasaun Estatál (MAE) daudaun ne’e halo hela prosesu akizisaun ba karimbu eleisaun. Aleinde ne’e, ekipa téknika sira sei prodús buletin votu ba Xefe suku hamutuk 72.726, ba Xefe aldeia hamutuk 63.635, delegadu no delegada hamutuk 36.363, reprezentante joven feto no mane hamutuk 1.000.

“Ita kondisiona númeru buletin votu ne’e karik akontese ronde daruak,” nia tenik.

Eleisaun tinan ne’e iha suku 10 ho ninia aldeia hamutuk 53 mak hanesan munisípiu Dili postu administrativu Cristo Rei suku ida mak Ailoc ho ninia aldeia hamutuk lima, postu administrativu Don Aleixo suku mak Bebonuk, Madohi no Manleuana aldeia hamutuk 28, postu administrativu Metinaro suku ida mak Mantelolão aldeia hamutuk neen.

Ba munisípiu Aileu postu administrativu Laulara mak suku Bocolelo, aldeia hamutuk haat, postu administrativu Aileu suku Lequitura iha aldeia haat, munisípiu Manatuto postu administrativu Lacló suku Laicore, aldeia haat, suku Uma-Caduac aldeia ida, no postu administrativu Barique, suku Sikone-Diloli, aldeia hamutuk rua no munisípiu Viqueque postu administrativu Ossu, suku Builo aldeia haat.

Jornalista      : Arminda Fonseca

Editora           : Julia Chatarina

iklan
iklan

Leave a Reply

iklan
error: Content is protected !!