iklan

HEADLINE, KAPITÁL

Mari Alkatiri konsidera vizita Papa Francisco nu’udar grasa no bensaun ba povu

Mari Alkatiri konsidera vizita Papa Francisco nu’udar grasa no bensaun ba povu

Amu Papa Francisco. Imajen/AP

DILI, 16 abríl 2024 (TATOLI)–Frente Revolusionária Timor-Leste Independente (FRETILIN) haksolok ho anúnsiu husi Konferénsia Episkopál Timorense  (CET, sigla portugés) kona-ba  kalendáriu vizita Sua Santidade Amu Papa Francisco mai Timor-Leste.

“Amu Papa Francisco sei vizita Timor-Leste iha loron 9 to’o 11 setembru  2024. FRETILIN haksolok tebes tanba  vizita Santo Padre nian ne’e nu’udar grasa no bensaun boot ida mai povu no nasaun Timor-Leste,” Sekretáriu  Jerál partidu FRETILIN, Mari Alkatiri, hato’o liuhusi nota ne’ebé Agência Tatoli asesu, tersa ne’e.

Bainhira Amu Papa São João Paulo II vizita mai Timor-Leste, iha loron 12 outubru 1989, São João Paulo II la’ós de’it sai úniku líder mundiál ne’ebé mai vizita, maibé nia vizita mós halo mundu  tomak asiste asu’wain  foin-sae timor-oan sira ba dahuluk liu hodi halo manifestasaun iha públiku kona-ba povu Timor-Leste nia luta ba ukun rasik-an.

Notísia relevante : Amu Papa mai Timor-Leste ho misaun rua

Tuir Alkatiri, Papa Francisco nia vizita tinan ne’e mai Timor-Leste mós koñesidu ho loron ida importante tebes iha Timor nia istória, tanba  vizita  ne’e se konklui iha loron 11 setembru, ne’ebé hanesan loron signifikadu boot rua iha Timor nia istória no identidade nu’udár nasaun  no povu.

“Iha loron 11 setembru tinan 50 liubá, Timor-Leste nia fundadór sira transforma ASDT ba FRETILIN hodi sai nu’udár frente ampla ne’ebé bele hakuak nasionalista hotu-hotu atu luta ba ita-nia ukun rasik-an,” nia tenik.

FRETILIN fiar katak vizita Papa Fransico ne’e sai hanesan bensaun boot, ne’ebé bele halibur povu Timor-Leste tomak atubele hamutuk ba luta povu tomak hodi sente dezenvolvimentu nu’udar rezultadu husi ukun rasik-an.

Jornalista     : Nelson de Sousa

Editora          : Julia Chatarina

iklan
iklan

Leave a Reply

iklan
error: Content is protected !!