Suku rua iha Covalima alvu ba implementasaun projetu redusaun risku ba dezastre
COVALIMA, 16 Abríl 2024 (TATOLI) – Organizasaun Internasionál ba Migrasaun (OIM) no autoridade Covalima identifika suku Maudemo iha postu Tilomar no Nanu iha Fatumea sai alvu ba implementasaun Projetu Redusaun Risku Dezastre ba Komunidade Frájil no Movel iha Timor-Leste.
Jerente Nasionál ba Programa Redusaun Risku ba Dezastre, Elisabet Araújo, informa katak projetu ne’e finansia hosi Governu Japaun no sei implementa durante tinan ida hodi bele hatene Autoridade Protesaun Sivíl (APC) nia kapasidade ba responde situasaun emerjénsia, liuhosi programa jestaun risku dezastre ne’ebé inkluzivu no sensivel ba jéneru.
OIM hala’o ona lansamentu ba projetu foun ne’e iha 27 Marsu 2024 iha Timor-Leste no sei implementa iha Covalima iha fulan ida ne’e.
Diretór Servisu Munisipál ba Protesaun Sivíl no Jestaun Risku ba Dezastre Naturál, João Martins, hateten depoizde halo identifikasaun ba suku rua ne’e, sei halo formasaun ba komunidade oinsá atu prevene risku husi dezastre naturál.
Nia salienta katak suku rua ne’e sai alvu ba projetu tanba haree ba tipu dezastre naturál ne’ebé akontese kada tinan, liuliu iha Maudemo ne’e sempre afeta husi inundasaun no iha Nanu kauza husi dezastre ho tipu anin boot.
Antes ne’e, OIM iha Timor-Leste partilla ona informasaun kona-ba oinsá atu responde ba risku dezastre naturál ba autoridade Covalima no parseiru sira. OIM organiza atividade referida, tanba xefe suku balun foin mak eleitu no administradór postu sira, nune’e bele hasa’e sira-nian koñesimentu atu responde ba katástrofe.
Atu halo prevensaun ba risku dezastre naturál mak presiza kuda ai-oan, halo tara-bandu iha suku no presiza hasa’e komunidade nia konxiénsia hodi labele tesi ai arbiru.
Dadus APC 2024 rejista família hamutuk 89 iha Covalima mak sai vítima ba dezastre naturál. Tipu dezastre ne’ebé akontese, entre Janeiru no Fevereiru, mak hanesan ahi han uma no anin sobu uma no, iha 2023, vítima ba dezastre naturál hamutuk uma-kain 994 no, iha 2022, rejista uma-kain 746.
Notísia relevante: OIM disemina informasaun kona-ba risku dezastre naturál ba autoridade iha Covalima
Jornalista: Celestina Teles
Editora:Maria Auxiliadora
