Autoridade Viqueque prevee orsamentu loke estrada ba fatin lixu tinan ne’e
VIQUEQUE, 17 abríl 2024 (TATOLI)—Autoridade munisípiu Viqueque prevee ona osan ho valór $243.366 iha kapitál dezenvolvimentu Orsamentu Jerál Estadu (OJE) 2024 hodi loke estrada ba fatin lixu, ne’ebé lokaliza iha suku Uma-ki’ik, postu Viqueque Vila, munisípiu Viqueque.
“Programa prioridade munisípiu Viqueque ba tinan ida-ne’e maka prevee ona orsamentu hodi loke estada ba fatin lixu. Estrada referidu ita loke iha área Sukaer-oan, suku Uma-ki’ik ho distánsia purvolta kilométru ida resin hodi akumula lixu sira iha Viqueque,” Diretór Servisu Obra Públika munisípiu Viqueque, Casildo Gomes Soares, informa ba Agência Tatoli, iha postu Viqueque Vila, kuarta ne’e.
Notísia relevante : Munisípiu Viqueque kontinua tau prioridade ba fatin lixu
Ekipa husi Programa Dezenvolvimentu Intergradu Munisipál (PDIM) sei prosesa dokumentu no bainhira ramata maka sei loke konkursu públiku hodi empreza sira bele konkorre.
“Data loke konkursu seidauk define, maibé projetu ne’e sei implementa iha tinan ida-ne’e tanba orsamentu tau ona. Ha’u sente fatin lixu ne’e importante tanba durante ne’e ita observa iha kapitál Viqueque, liu-liu postu Viqueque Vila laiha fatin lixu próporiu hodi abitante sira bele soe lixu, nune’e dala barak soe arbiru. Tanba ne’e, ho planu munisípiu nian, bele loke dalan ba fatin lixu. Ha’u sente abitante sira sei la soe lixu arbiru bainhira iha ona fatin lixu,” nia akresenta.
Orsamentu ne’ebé prevee hodi halo akizisaun sasán no loke estrada, ne’ebé sei akompaña husi ekipa Servisu Obra Públika no PDIM Viqueque.
Iha fatin hanesan, Xefe suku Uma-ki’ik, postu Viqueque Vila, Claudino Amaral, agradese ba inisiativa Governu tanba bele redús lixu sira ne’ebé namkari iha kapitál Viqueque.
“Abitante sira husi suku Uma-ki’ik sira maka oferese rai ba munisípiu hodi halo fatin lixu no loke estrada. Fatin lixu ne’e ho distánsia dook husi abitante sira, ba futuru sei la fó impaktu ba sira,” nia tenik.
Jornalista : Vitorino Lopes da Costa
Editora : Julia Chatarina
