VIQUEQUE, 17 abríl 2024 (TATOLI)—Empreza manan-na’in konkursu públiku, Helfia Unip, Lda sei implementa serbisu sistema melloramentu bee-moos iha postu Uatucarbau, munisípiu Viqueque iha fulan-abríl tinan ne’e nia-laran.
“Bee Timor-Leste, Empreza Públika (BTL, E.P) selebra kontratu ho empreza Helfia iha loron 25 marsu ne’e, ba implementasaun obra melloramentu bee-moos iha suku Uani-uma no suku Irabin de Baixo iha postu Uatucarbau. Empreza iha fulan-abríl ne’e hahú aprezenta-an iha postu no kontinua halo sosializasaun ba autoridade, na’in ba rekursu bee no abitante Uatucarbau hodi sira bele esklarese kona-ba implementasaun kanaliza bee-moos ba abitante,” Koordenadór BTL, E.P Viqueque, Marito da Costa, informa ba Agência Tatoli, iha ninia knaar fatin, kuarta ne’e.
Obra ne’e sei implementa ho durasaun tinan-ida, obra ne’e tuir planu sei finaliza iha marsu 2025 ho kustu projetu $334.472.
Projetu ne’e ho sistema gravitasaun hodi kanaliza bee-moos husi rekursu bee-matan Uabati, ne’ebé lokaliza iha suku Irabin de Baixo ho nia débitu 45 lps.
Notísia relevante : BTL Viqueque husu empreza Timorindo kontinua projetu dada bee-moos iha Lacluta
Projetu ne’e sei transforma ba sistema urbana tanba sei instala mós metru kontadór ba benefisiáriu sira. Kanalizasaun instala kanu transmisaun ho distánsia kilómetru 8 no instalasaun liña distribuisaun ho distánsia kilómetru 11.
Obra ne’e sei sei fó benefísiu ba populasaun hamutuk 5.910 iha suku Uani-uma no suku Irabin de Baixo.
Ekipa téknika sei instala metru kontadór unidade 985 ba uma-kain hamutuk 985 inklui fornese bee-moos ba postu saúde, eskola, merkadu no igreja.
Iha fatin ketak, Xefe suku Irabin de Baixo, José Baptista do Carmo, hateten, hafoin halo sosializasaun maka tama ba prosesu kontrusaun.
“Ami-nia esperansa maka prosesu kanalizasaun ida-ne’e bele aselera, nune’e tinan oin abitante sira bele asesu ba bee-moos,” nia tenik.
Jornalista : Vitorino Lopes da Costa
Editora : Julia Chatarina