BAUCAU, 17 abríl 2024 (TATOLI) – Juventude hosi munisípiu tolu hamutuk na’in-tolu, kuarta ne’e, tuir formasaun movel guia turístika husi Ministériu Turizmu no Ambiente (MTA) iha Baucau.
Sub Inspetór Auditória Internál, Diresaun Servisu Ministériu Turizmu no Ambiente, Luis Imanuel Soares Doutel, esplika, formasaun referida hala’o bazea ba polítika IX governu konstitusionál tanba hakarak apoia iha setór mikro-finansa no médiu empreza hanesan iha setór turizmu liuliu artezenatu, kafetária, restaurante no ‘Guest house’.
“Ita kontinua ho Empoderamentu nian; fó formasaun ba atividade ne’e atu nunee sira bele iha kbiit hala’o nia atividade di’ak liután,” Luis Doutel hateten iha Vila nova.
MTA liuhusi Diresaun Nasionál Merkadu Turizmu realiza formasaun movel guia turístika iha Munisípiu Baucau atu kapasita empreza ki’ik sira halo antendementu di’ak liutan ba vizitante sira iha fatin-serbisu.
Matéria prinsipál ne’ebé hetan durante formasaun mak matéria báziku kona-ba maneira atendementu ba vizitante sira inklui língua inglés bázika kona-ba ospitalidade, atende vizitante sira husi estranjeiru.
Luis Doutel, argumenta, matéria hirak-ne’e, importante atu partisipante sira hatene liuliu joven kreativu sira nune’e bainhira halo negósiu iha área kafetária, artezenatu, ‘Guest house’ no restaurante sira bele ko’alia lian inglés no iha atitude atendementu di’ak.
“Objetivu atu hasa’e sira-nia kapasidade nune’e halo atendementu ba ema di’ak liután,” Doutel akresenta.
Prezidente Autoridade Munisipál (PAM) Baucau, Veneranda Eurico Marques Lemos Martins, louva no apresia ba programa Ministériu Turizmu no Ambiente nian tanba hakbesik ba jovem kriativu sira liuliu hasa’e kuñesementu kona-ba ospitalidade.
“Hau husu partisipante sira atu fokus, nune’e sai husi fatin formasaun bele lori materia di’ak ba fatin serbisu,” Veneranda hateten.
Partisipante Mario Soares Freitas, kontenti tuir formasaun husi MTA tanba bele aumenta abilidade ba atendementu nian iha fatin-serbisu artezenatu nian.
“Sente kontente ho formasaun ne’e, tanba bele eleva ami-nia kapasidade hodi atende ema, liuliu ema estranjeiru sira,” nia dehan.
Entertantu, partisipante na’in-30 maihosi munisípiu tolu hanesan Lautém, Manatuto no Baucau ne’ebé atúal hala’o kna’ar iha restaurante, kafetária, ‘Guest house’.
Jornalista : Natalino Belo
Editór : Rafael Ximenes de A. Belo
