DILI, 17 abríl 2024 (TATOLI)—Governu liuhusi reuniaun Konsellu Ministru, kuarta ne’e, delibera hodi aprova adjudikasaun kontratu kona-ba projetu reabilitasaun estrada munisipál pakote 2, Uatulari-Laisorulai, munisípiu Viqueque ho distánsia kilómetru 22.
“Adjudikasaun kontratu ne’e ba empreza Shanghai Construction Co.Ltd, ne’ebé aprezenta proposta di’ak liu, bazeia ba avaliasaun téknika no finanseira kombinada,” Vise-Ministru Asuntu Parlamentár, Adérito Hugo da Costa, hateten, hafoin reuniaun ezekutivu, iha Palásiu Governu.
Notísia relevante : MOP-DNA finaliza ona dezeñu detalladu ba projetu 35
Portavós IX Governu ne’e dehan, hafoin aprovasaun dekretu-lei númeru 15/2024, loron 20 marsu, kona-ba rejime estraordináriu aprovizionamentu liuhusi ajuste diretu kontratu públiku ba obra sira ne’ebé hahú laiha formalizasaun kontratuál, tuir relatóriu ne’ebé prepara husi Ajénsia Dezenvolvimentu Nasionál (ADN), nune’e Konsellu Ministru delibera hodi aprova obra ne’ebé sei hetan kontratu hodi kontinua no finaliza, ka hodi selu ba serbisu ne’ebé hala’o ona ho efetiva, nune’e mós ba despeza idaidak.
Antes ne’e, MOP liuhosi Diresaun Nasionál Aprovizionamentu (DNA), iha tinan 2021 kedan finaliza ona dezeñu enjeñeiru detalladu husi projetu hamutuk 35 inklui estrada Uatulari-Laisorulai.
Kustu ba dezeñu enjeñeiru detalladu estrada Uatulari-Laisorulai $400.000.
Jornalista : Antónia Gusmão
Editora : Julia Chatarina
