DILI, 17 abríl 2024 (TATOLI)—Governu liuhusi reuniaun ordinária Konsellu Ministru (KM) delibera hodi aprova tema ‘Hametin Instituisaun Estadu Hodi Serbí Povu’ ba komemorasaun loron 20 maiu 2024.
Vise-Ministru Asuntu Parlamentár, Adérito Hugo da Costa, hateten, iha ámbitu komemorasaun restaurasaun independénsia ba dala-22 ne’e sei ratifika mós adezaun Timor-Leste ba Organizasaun Mundiál Komérsiu (OMK).
“Iha komemorasaun ne’e sei iha eventu importante balun, aleinde ratifika Timor-Leste ba Organizasaun Mundiál Komérsiu, iha mós vizita Sultan Brunei Darussalam, Hassanal Bolkiah mai Timor hodi asina akordu entre Governu Brunei Darussalam ho Timor-Leste, liuhusi liña ministeriál sira, ne’ebé Sultan Bolkiah interrese atu selebra akordu,” Adérito Hugo da Costa hateten hafoin reuniaun ezekutivu, iha Palásiu Governu.
Notísia relevante : Governu aprova proposta ratifikasaun protokolu adezaun ba OMK
Asinatura akordu ne’ebé país rua sei asina iha área edukasaun, saúde nomós petróleu no gás.
Governu forma ona komisaun bazeia ba despaisu Primeiru-Ministru, Kay Rala Xanana Gusmão, númeru 023/GPM/III/2024 hodi dezigna Ministru Administrasaun Estatál, Tomás do Rosário Cabral lidera Komisaun Organizadora, enkuantu Vise-Ministru, Jacinto Rogoberto Gomes mak responsável ba seremónia isar Bandeira Nasionál, Vise Ministru Komérsiu Indústria, Augusto Júnior Trindade responsável ba organizasaun feira no kalan kultural, Vise-Ministra Asuntu ASEAN, Milena Maria da Costa Rangel nu’udar responsável ba protokolu no akollimentu ba konvidadu VIP.
Jornalista : Antónia Gusmão
Editora : Julia Chatarina
