DILI, 09 abríl 2024 (TATOLI)—Governu liuhusi reuniaun Konsellu Ministru (KM), tersa ne’e, aprova projetu proposta rezolusaun ba Parlamentu Nasionál, ne’ebé aprezenta husi Vise Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, kona-ba ratifikasaun protokolu adezaun ba Organizasaun Mundiál Komérsiu (OMK).
Vise Primeiru-Ministru, Francisco Kalbuadi Lay, iha loron 26 fevereiru liubá asina ona protokolu adezaun ba OMK ho Diretora-Jerál organizasaun, Ngozi Okonjo-Iweala, durante konferénsia ministeriál OMK ba dala-13, iha Abu Dhabi, Emiradu Árabe Unidu.
“Adezaun ba OMK ne’e hanesan pasu krusiál ida hodi promove reforma ekonómika iha Timor-Leste no marka avansu signifikativu ida iha liberalizasaun komérsiu, insersaun iha ekonomia globál no fasilitasaun hodi asesu ba merkadu internasionál,” Vise-Ministru Asuntu Parlamentár, Adérito Hugo da Costa, relata hafoin reuniaun ezekutivu, iha Palásiu Governu.
Notísia relevante : Timor-Leste formalmente asina ona deklarasaun sai membru OMK
Depoizde Ezekutivu sira aprova peoposta ne’e, submete kedas ba Parlamentu Nasionál hodi hetan aprovasaun tuir lei haruka.
Iha sorin seluk, Vise Primeiru-Ministru, Francisco Kalbuadi Lay, reforsa katak, tuir protokolu OMK nian tenke lori ba Parlamentu Nasionál hodi ratifika.
“Bainhira ratifika tiha maka durante loron-30 nia laran Sekretariadu OMK anunsia formalmente ita tama nu’udar membru planu OMK,” Kalbuadi dehan.
Timor-Leste nia esforsu adere ba OMK inisia iha novembru 2016 no iha loron 07 Dezembru 2016 Konsellu Jerál estabelese Grupu Traballu, nune’e hafoin tinan-14 Grupu Traballu prepara dokumentu nesesáriu sira hodi kumpre regra OMK.
Iha loron 01 outubru 2020 Timor-Leste realiza enkontru Grupu Traballu dahuluk ho nasaun membru OMK sira hodi diskute ho kle’an kona-ba seriedade aplikasaun sai membru planu.
Durante ne’e Timor-Leste hamutuk ho país 22 seluk sai observadór hodi akompaña prosesu no kumpre rekezitu hodi sai membru hanesan ho nasaun 164 sira seluk.
Hanesan país observadór, Grupu Traballu hanesan komité traballu hodi halo preparasaun, negosiasaun, prienxe rekezitu no tuir enkontru koordenasaun ho Estadu membru.
Adezaun ba organizasaun mundiál ne’e ho hanoin ida katak Governu bele halo parseria ho setór privadu nasionál no internasionál atu loke kampu traballu ba timor-oan.
OMK hanesan organizasaun neʼebé regula komérsiu entre país sira ho objetivu atu garante katak atividade komersiál hotu la’o ho forma fasil, livre, previzível no posível.
Jornalista : Antónia Gusmão
Editora : Julia Chatarina
