iklan

EKONOMIA, INTERNASIONÁL

Timor-Leste formalmente asina ona deklarasaun sai membru OMK

Timor-Leste formalmente asina ona deklarasaun sai membru OMK

Seremónia asinatura deklarasaun Timor-Leste sai membru OMK. Imajen Tatoli/Joanico de Araújo

ABHU DHABI, 26 fevereiru 2024 (TATOLI)- Timor-Leste, liuhusi Vise-primeiru-ministru no Ministru koórdenadór asuntu ekonomia, Francisco Kalbuady Lay ho Diretora-jerál Organizasaun Mundiál Komérsiu Ngozi Okonjo-Iweala, formalmente, asina ona deklarasaun sai membru Organizasaun Mundiál Komérsiu (OMK).

Iha intervensaun ofisiál iha sesaun solene konferénsia ministeriál, Diretora-jerál OMK, Ngozi Okonjo-Iweala hato’o bemvinda ba país membru foun, hanesan Timor-Leste no Comoros – país independente Áfrika Austrál, ne’ebé asina ona adezaun formál hanesan membru OMK.

“Ho laran haksolok tebes iha ámbitu konferénsia ministeriál ne’ebé realiza iha Abu-Dhabi Emiradus Arabes Unidus (EAU) rejiaun Golfu nian ita iha notísia di’ak tanba ita iha membru foun husi nasaun rua ita hato’o boas-Vindas ba membru foun husi Nasaun rua ne’e mak Timor-Leste no Comoro’s,” Ngozi Okonjo-Iweala hateten, iha ámbitu sesaun abertura ba konferensia ministeriál nível altu ba OMK ba dala-XIII ho tema : “Delivering for People Through Trade” ka (Servi Ema Hotu liuhusi Komérsiu), iha sentru ezpozisaun Nasionál Abu-dhabi –EAU, segunda ne’e.

Diretora-jerál Ngozi Okonjo-Iweala afirma tan katak país menus dezenvolvimentu sira hakarak no entuziasmu tebes hakarak hola parte hanesan observadór ba OMK nuneé bele manan esperiénsia balun antes hola parte sai hanesan membru ativu organizasaun refere.

“Nasaun 22 iha tempu tuirmai buka hela dalan no espasu oinsá sai membru ba OMK. Nasaun sira ne’e hotu oras ne’e hola parte iha ita-nia leet hanesan observadór inklui mós kontijente mundu Árabe nian,” diretora-jerál ne’e hateten.

“Iha oportunidade hirak tuirmai adesaun ba Organizasaun Mundiál Komérsiu ejize kompromisiu ne’ebé konstitui tuir proposta ne’ebé OMK proposiona no ohin Timor-Leste no Comoros eleva ona membru sai ba 166. Ita espera iha tempu tuirmai sei aumenta liután númeru ne’e,” nia reforsa tan.

Iha biban ne’e, Prezidente repúblika, José Ramos Horta, iha sesaun solene abertura ba konferénsia ministeriál OMK, iha nia diskursu, afirma, Timor-Leste hola parte hanesan país observadór iha dezembru 2016. Hahú iha ne’ebá jornada ida atu hakat ba membru OMK.

“Ohin, ha’u ho delegasaun mai iha ne’e ho laran haksolok tebes hodi sai testamuña ba Timor-Leste hodi adopta ofisialmente pakote adezaun ba Timor-Leste nian iha Organizasaun Mundiál Komérsiu,” Horta haktuir hodi apresia.

Xefe Estadu afirma tan katak adezaun Timor-Leste ba OMK marka tan pasu importante ho sentidu liberalizasaun komérsiu no integrasaun ba ekonomia globál hodi asesu ba merkadu internasionál, liuhusi adezaun Timor-Leste iha OMK mós bele kontinua mellora liután infra-estrutura, dezenvolvimentu kapitál umanu, kapasidade administrativa no kresimentu iha diversifikasaun ekonómika.

Prezidente repúblika, José Ramos Horta, akresenta, ho apoiu komunidade internasionál bele permiti Timor-Leste adopta lejislasaun sira ne’ebé adekuada hodi simplifikasaun ba burokrasia administrasaun, mellora rekursu umanu, expande dezenvolvimentu infraestrutura ne’ebé alinadu ho prinsípiu OMK nian.

Ramos Horta mós agradese ba envolvimentu ativu sekretariadu OMK nian ne’ebé ho lideransa vizionária ne’ebé lidera husi diretora-jerál Ngozi Okonjo-Iweala, ho adezaun ne’ebé selebra ona iha MC13 (Ministerial Conference-XIII) ida ne’e mós bele kontribui ona ba Timor-Leste nia Adezaun ba Nasaun Sudeste Aziatiku ka ASEAN.

Entretantu, Organizasaun Mundiál Komérsiu mak organizasaun intergovernmentál ne’ebé regula komérsiu globál entre nasaun membru 166 ho prinsípiu mak:

  1. Promove Liberalizasaun Komérsiu Internasionál, reduz no elimina barreira komersiál ho tarefa no subsídiu.
  2. Estabelese regra no norma komún hodi garantia transparánsia, ba konkorénsia leál no no tratamentu iguál ba país membru sira.
  3. Monitoriza no halo revizaun ba polítika komersiál ba Estadu membru hodi asegura no kumpre ba akordu sira solusaun ba konflitu.
  4. Toma konsiderasaun ba diferente nasaun sira dezemvolvidu no dezenvolvimentu, oferese tratamentu espesiál ba ida ne’ebé ki’ak no vulnerável liu.

 

Notísia relevante:PR Horta kondekora Ngoji Okonjo-Iweala ho kolár ordem Timor-Leste

 

Jornalista: Joanico de Araújo

Editór: Rafael Ximenes de A. Belo

 

iklan
iklan

Leave a Reply

iklan
error: Content is protected !!