iklan

INTERNASIONÁL

PR Horta kondekora Ngoji Okonjo-Iweala ho kolár ordem Timor-Leste

PR Horta kondekora Ngoji Okonjo-Iweala ho kolár ordem Timor-Leste

Xefe Estadu Timor-Leste, José Ramos Horta atribui kondekorasaun Kolár Ordem Timor-Leste ba Diretora-jerál Organizasaun Mundiál Komérsiu (OMK), Ngoji Okonjo-Iweala, iha Abu Dhabi National Exhibition Centre-ADNEC. Imajen Tatoli/Joanico de Araújo

ABU DHABI, 25 fevereiru 2024 (TATOLI)-Prezidente repúblika (PR), José Ramos Horta kondekora Diretora-jerál Organizasaun Mundiál Komérsiu (OMK), Ngoji Okonjo-Iweala, ho kolár ordem Timor-Leste perante Prezidente Parlamentu Nasionál ho Xefe Bankada Parlamentár sira, Vise Primeiru-ministru Francisco Kalbuady Lay no membru Governu balun nune’e mós Reprezante Embaixadór Timor-Leste iha Jenebra.

Kondekorasaun ne’e, Xefe Estadu Timor-Leste atribui iha reuniaun bilaterál hamutuk ho Diretora-jerál Organizasaun Mundiál Komérsiu (OMK) relasiona ho konferénsia ministeriál ba dala-13 (KF13) liga ba adezaun Timor-Leste ba organizasaun mundiál ne’e.

Xefe Estadu kongratula Diretora-jerál, Vise diretora-jerál no funsionáriu hotu ne’ebé servisu iha OMK.

“Tempu ne’e Diretora-jerál OMK simu kolar ordem Timor-Leste nian no apresia ba dedikasaun, orientasaun no servisu sira hodi Vise Primeiru-Ministru Kalbuady Lay ba reuniaun grupu servisu nian liga adezaun nian ne’ebé hala’o iha Jenebra, 2023,” Prezidente repúblika, José Ramos Horta, hateten.

“Importante tebes ba nasaun ki’ik eh boot, presiza regra hodi adere ba organizasaun mundiál ne’e, ba Timor-Leste nu’udar nasaun ki’ik, regra sira signifika protesaun no iha kapaz atu rezolve disputa sira ne’ebé eziste iha mekanizmu internasionál. Timor-Leste hetan experiénsia pozitivu iha rezolve diferénsia negosiasaun nian,” Ramos Horta hateten tan.

Ngoji Okonjo-Iweala sente haksolok ba kondekorasaun ne’ebé valoriza servisu Nigeriana ne’e la’os de’it ninia servisu iha organizasaun ne’e maibé iha ninia dedikasaun hotu iha servisu públiku nian.

“Ha’u labele dehan ha’u merese ka lae ba kondekorasaun ne’e maibé agradese tanba valoriza ha’u-nia servisu tempu tomak nian. Agradese tebes no prontu servisu hamutuk hodi lori benefísiu ba Timor-Leste,” líder OMK ne’e kompromete.

Ekonomista nijeriana, Ngoji Okonjo, atuál diretora-jerál OMK ne’e, kompara, adezaun Timor-Leste nia ba organizasaun la’o lalais tebes iha sesaun OMK nian durante tinan barak liubá, esperiénsia sira sai nu’udar inspirasaun no enkoraja nasaun sira.

Fó hanoin fali, Timor-Leste formaliza nia pedidu adezaun ba OMK dezde tinan 2016 no asinatura ba adezaun nian sei realiza iha Konferénsia Ministeriál ba dala-13.

Entretantu, serimónia kondekorasaun ne’ebé hala’o iha Abu Dhabi National Exhibition Centre-ADNEC, la’ós ba de’it Ngozi Okonjo-Iweala nia servisu iha OMK ka World Trade Investment (sigla inglés) liga ba adezaun Timor-Leste nian, maibé mós ba servisu antesedénsia (background) Diretora-jerál nian iha luta ba enkoraja no integridade governasaun di’ak iha pozisaun oioin nível nasionál no internasionál.

OMK nu’udar instituisaun ne’ebé mak harii iha loron 1 janeiru 1995 ho sede iha Jenebrá, Suíça, ho objetivu atu superviziona no liberaliza komérsiu internasionál.

 

Jornalista: Joanico de Araújo

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!