DILI, 17 abríl 2024 (TATOLI)–Komisaun A ne’ebé trata asuntu Justisa no Konstituisionál, kuarta ne’e, halo aprovasaun relatóriu no paresér kona-ba proposta-lei númeru 6/VI(1a)-alterasaun daruak lei númeru 8/2009, 15 jullu, kona-ba lei Komisaun Antí-Korrupsaun (CAC, sigla portugés)
“Ohin, reuniaun komisaun aprova ona relatóriu no paresér. Agora duni finaliza redasaun finál hafoin submete ba meza parlamentu hodi ajenda ba diskusaun iha jeneralidade iha plenária,” Prezidente Komisaun A, Deputadu Patrocínio dos Reis Fernandes, relata iha sala komisaun PN.
Apresiasaun inisiál husi komisaun ba proposta-lei ne’e prienxe rekezitu atubele halo alterasaun nune’e bele diskute iha faze jeneralidade.
Relata mós komisaun nia audiénsia ho autór inisiativa lejizlativa husi parte Governu kona-ba perspetiva polítika atu halo alterasaun ba lei ne’e.
“Komisaun to’o ikus hateten inisiativa ne’e merese duni hetan fatin no prienxe rekezitu konstituisionál no legál atubele halo aprovasaun iha plenária,” nia akresenta.
Notísia relevante : PN aprova pedidu urjénsia husi Governu ba alterasaun lei CAC
Tuir rejimentu PN artigu 105.º inísiu diskusaun iha alínea 1, hateten diskusaun iha jeneralidade foka ba prinsípiu no sistema projetu ka proposta-lei ida-idak nian.
Hafoin diskusaun jeneralidade ramata, sei kontinua diskusaun iha faze espesialidade ne’ebé sei foku espesífiku ba mateira iha kada artigu ba proposta-lei ne’ebé aprezenta.
Tuir Lei n°8/2009, 15 jullu, iha artigu 7 númeru 1, katak PN mak dezigna komisáriu CAC ho maioria absoluta, nune’e bainhira hetan prezensa husi pelu menus ¾ husi deputadu ho efetividade funsaun.
Iha alterasaun ne’ebé Governu propoin iha artigu 7° hodi dezigna komisáriu, ho artigu 11 hodi halo ezonerasaun ba komisáriu ho maioria absoluta de’it (Deputadu 33), hasai tiha ezijénsia prezensa ¾ ka husi deputadu na’in-49 ho efetividade funsaun.
Enkuantu, iha 12 abríl liubá, PN liuhusi reuniaun plenária estraordináriu, aprova pedidu urjénsia husi Governu ba diskute alterasaun daruak hosi lei númeru 8/2009, loron 15 jullu, kona-ba lei CAC.
Jornalista : Nelson de Sousa
Editora : Julia Chatarina
