Komisaun A husu Governu aprezenta fali lei Ordem Médiku
DILI, 17 abríl 2024 (TATOLI)–Parlamentu Nasionál (PN) liuhusi Prezidente Komisaun A ne’ebé trata asuntu Justisa no Konstituisionál, Patrocínio dos Reis Fernandes, husu Governu atu aprezenta proposta-lei Ordem Médiku mai órgaun lejislativu tanba iha ligasaun ho polítika ezekutivu nian.
“Ordem Médiku ne’e iha ligasaun ho polítika IX Governu, tanba ne’e iha Parlamentu hein se iha inisiativa mai husi Governu, ita halo andamentu,” Deputadu bankada Governu ne’e hateten ba Agência Tatoli, iha resintu, kuarta ne’e.
Nia mós husu atu parte Asosisaun Médiku Timor-Leste (AMTL) atu halo aprosimasaun ho Governu atu submete inisiativa ruma.
Notísia relevante : PN aprova projetu-lei Ordem ba Médiku TL iha jeneralidade
Antes ne’e, Prezidente AMTL, Rui Maria de Araújo, husu órgaun lejislativu atubele fó prioridade diskute filafali inisiativa lejislativu kona-ba Ordem Médiku, ne’ebé iha lejizlatura dalimak konsege diskute ona no besik ramata, nune’e hein tama iha diskusaun faze finál globál mak la konsege kontinua to’o kaduka. Lei ne’e rasik importante tebes ba profisionál saúde sira.
Jornalista : Nelson de Sousa
Editora : Julia Chatarina
