DILI, 16 abríl 2024 (TATOLI)—Asosiasaun Jornalista Timor-Leste (AJTL) hamutuk ho ONG Oxfam loke hikas fali Mídia Tour ba tinan 2024 ho tema “Haforsa lian no kreatividade foinsa’e inkluzivu” ne’ebé sei foku ba munisípiu Ermera.
Prezidente AJTL, Zevonia Vieira hateten, tinan ida-ne’e AJTL parseria ho Oxfam hodi implementa mídia tour 2024 katak ho partisiapsaun mídia nian promove juventude sira ba diversifikasaun ekonomia, buka sira-nia istória susesu no oinsá ukun-na’in sira bele foti solusaun ba dezafiu sira-ne´ebe joven hasoru.
“Ida-ne’e mak objetivu ne’ebé ita halo no sira rasik bele komprende asuntu sira hodi fó hanoin ba Governu hodi tau atensaun ba setór produtivu ba sira-nia prioridade. Tinan ne’e, ita sei ba Ermera hodi vizita joven sira-ne’ebé hanesan eis traballador Australia no haree direta sira-nia produtividade no sai referensia ida,” Prezidente AJTL ne´e hateten iha nia intervensaun iha abertura Mídia Tour 2024 iha Edifísiu Oxfam, Hudi-laran, segunda ne’e.
Nia hato’o agradesimentu ba Oxfam hodi kontinua fó fiar ba AJTL atu implementa programa Mídia Tour ho hanoin katak advokasia mídia nian importante tebes atu fó espasu ba joven sira hodi ko’ alia.
Diretur Programa Oxfam iha Timor-Leste, Jude Pereira, apresia ba kolaborasaun di’ak AJTL nian hodi akumula mídia sira hodi halo kobertura ba joven nia kreativdade iha área rurál inklui bolu mós reprezentante governu hodi partilla informasaun liga ba joven sira-nia moris.
“Ida-ne’e oportudiade di’ak tanba iha espasu ne’ebe nakloke ba jornalista no mídia sira bele halibur informasun hodi halo kobertura ba kreatividade joven nian iha setór agrikultura, promove poténsia, hasa’e koñesimentu, informa ba ukun-na’in sira ka politika-na’in sira, saida mak joven sira halo,” nia esplika.
Program Mídia Tour ne’e, hetan apoiu husi Governu Austrália liuhusi DFAT (Department of Foreign Affairs and Trade) ho nia programa PROSIVU.
Mídia Tour ba tinan ida-ne’e, sei halo durante loron lima nia laran ne´eb´e sei hahú hala’o iha loron 16 to’o 20 abríl, ho partisipasaun jornalista 15 husi mídia sira hanesan RTTL, TVE, Gardamor, Independente, Timor Post, Dili Post, Neon Metin, Lafaek News, Media Mudansa, Radio Labeh, Radio Liberdade, Diligente dan Tatoli.
Durante loron lima, jornalista sira sei partisipa iha Workshop kona-ba reintegrasaun traballadór Austrália nian ne’ebé aprezenta husi SEFOPE no diversifikasuan ekonomia husi oradór ONG La’o Hamutuk.
Ba loron daruak, partisipante sira sei halo identifikasaun angulu notisia no dezeñu rasik ToR (Termu de Referensia) hodi prodús istória molok ba halo kobertura direta iha munisípiu Ermera iha loron 18 to’o 20 abríl.
Jornalista : Cidalia Fátima
Editór : Cancio Ximenes
