iklan

HEADLINE, OÉ-CUSSE (RAEOA)

Ministériu Saúde inspesiona klínika privada lima iha Oé-Cusse

Ministériu Saúde inspesiona klínika privada lima iha Oé-Cusse

Diretór Gabinete Lisensiámentu no Rejistu Atividade Saúde, Nunu da Costa de Jesus. Foto/Abílio Elo Nini

OÉ-CUSSE, 17 Abríl 2024 (TATOLI) – Gabinete Lisensiamentu no Rejistu Atividade Saúde (GLRAS) husi Ministériu Saúde (MS) sei halo inspesaun bá klínika privadu sira iha Rejiaun Administrativa Espesiál Oé-Cusse Ambeno (RAEOA), nune’e bele fa’an ai-moruk tuir padraun ministériu nian.

Diretór Gabinete Lisensiamentu no Rejistu Atividade Saúde, Nuno da Costa de Jesus, hateten Oé-Cusse nu’udar rai-ketan no dook husi servisu sentrál, maibé ekipa husi GLRAS identifika ona klínika privadu ne’ebé halo atendimentu saúde iha Oé-Cusse, liuliu iha Pante Makasar.

Ekipa GLRAS sei halo mós sensibilizasaun ba klínika privada sira atu hala’o atividade no aposta sira-nia kapitál ho loloos no la’ós ne’e de’it, maibé ba naun-krutivu hanesan mós klínika madre sira-nian ne’ebé halo mós atendimentu.

“Sensibilizasaun remata ekipa sei monitoriza. Se klínika balun fa’an ai-moruk la tuir padraun, ami-nia ekipa sei haree no hato’o nota informativa, depois Gabinete Inspesaun bele fó sansaun tuir dekretu-lei ne’ebé iha ona”, Nuno de Jesus hateten iha Oé-Cusse.

Nia salienta katak bainhira setór privadu sira hahú trata dokumentu ba lisensiamentu atividade saúde, parte ministériu sempre fó kritéria katak antes fulan tolu lisensiamentu remata tenke submete ona dokumentu, nune’e bele hetan renovasaun, no bainhira simu ona kritéria maibé implementasaun iha terrenu la tuir dalan legál, bele hetan sansaun.

Tanba ne’e, nia husu klínika sira atu kumpre enkuadramentu legál sira hanesan dekretu-lei númeru 3/2019, ne’ebé hetan alterasaun husi dekretu-lei númeru 53/2020, fó kompeténsia ba GLRAS hodi fasilita lisensamentu importasaun no esportasaun ai-moruk no ekipamentu saúde.

Sekretáriu Rejionál Saúde, Luís de Jesus Neno, esplika katak klínika privada lima ne’e maioria iha sub-rejiaun Pante Makasar, tanba lei autoriza sidadaun hotu bele loke, maibé persiza la’o tuir regulamentu ne’ebé hatuur ona iha Ministériu Saúde, katak atu loke persiza rekursu no rekursu ne’e tenki rejístu tuir baze legál, persiza ema eskola ba saúde maibé la’os profisionál Governu nian, tanba iha lei númeru 86/2022 la fó dalan ba serbisu profisionál saúde sira-ne’ebé hala’o ona serbisu iha Governu halo tan atividade iha klínika privada.

“Iha Oé-Cusse klínika privada iha no fa’an ai-moruk. Klínika sira-ne’e, ita sei koordena atu uza pesoál lisensiatura saúde nian, tanba durante ekipa monitoriza, klínika balun uza rekursu la’ós profisionál saúde”, nia dehan.

Notísia relevante:  MS sensibiliza enkuadramentu legál rejistu profisionál saúde no atividade lisensiamentu iha Oé-Cusse

Jornalista: Abílio Elo Nini

Editora: Maria Auxiliadora

iklan
iklan

Leave a Reply

iklan
error: Content is protected !!