MPIE introdús projetu jestaun integrada reziduu sólidu iha Oé-Cusse
OÉ-CUSSE, 17 Abríl 2024 (TATOLI) – Ministériu Planeamentu no Investimentu Estratéjiku (MPIE) introdús projetu jestaun integrada reziduu sólidu, liuhusi Programa Preparasaun Implementa Projetu (PPIP) ba autoridade Rejiaun Administrativa Espsiál Oé-Cusse Ambeno (RAEOA).
João Pereira Jerónimo, nu’udar fasilitadór Projetu PPIP iha MPIE informa, projetu ne’e hetan tulun husi Banku Investimentu Europeia, apoia ba iha setór tolu mak bee no saneamentu, reziduu sólidu no floresta.
“Kona-ba setór reziduu sólidu, ami la’o hamutuk ho Ministériu Administraasaun Estatál, hanesan na’in no benefisiáriu ba projetu ida-ne’e”, João Pereira Jerónimo ko’alia iha salaun adminitrasaun Numbei-Oé-Cusse, ohin.
Nia esplika katak objetivu husi projetu ne’e mak atu halo estudu viabilidade iha territóriu no daudaun ne’e hahú ona iha munisipiu, atu halo sanitáriu, fatin ne’ebé atu soe fo’er nian, no iha Timor-Leste sei destaka iha rejiaun tolu.
Hanesan rejiaun leste sei tau iha Vemasse, súl iha Ainaro, tanba fatin identifikadu ona no norte sei tau iha Díli no envolve ona Oé-Cusse.
“Maibé fo’er sira iha Oé-Cusse se bá Díli ne’e, la’ós fo’er baibain, maibé fo’er importadu ona, ne’ebé se laiha difikuldadade ba fatin. Reziduu sólidu seluk sei halo ba resiklajen hanesan ai-tahan, kaixa, bee aqua botir, lata no seluk tan”, nia salienta.
Iha biban hanesan, Sekretáriu Rejionál ba Asuntu Administrasaun, Andre Lao, reprezenta Prezidente Autoridade RAEOA, agradese ba Governu Sentrál tanba bele introdús planu estratéjiku ida kona-ba jestaun lixu nian.
“Oé-Cusse, liuliu Pante Makasar área urbana. Atu jere programa ne’e, persiza estudu ne’ebé di’ak, ita tau importánsia ba jestaun administrasaun kona-ba programa ne’e nia di’ak ba futuru. Entaun, ohin ita foin hahú ko’alia. Persiza halo diskusaun hamutuk ho autoridade lokál sira atu entende didi’ak programa ne’e nia benefísiu”, nia realsa.
Nótisia relevante: MPO-RAEOA diskute jestaun lixu sólidu
Hola parte iha aprezentasaun ne’e mak Koordenadór Ezekutivu Zona Espesiál Ekonomia no Dezenvolvimentu Oé-Cusse Ambeno (ZEEDOA), João Mendes Gonçalves, xefe suku no jestór sub-rejiaun sira no o mebru Autoridade RAEOA.
Jornalista: Abílio Elo Nini
Editora: Maria Auxiliadora
