iklan

INTERNASIONÁL

Ohin Illa Salomon realiza Eleisaun jerál, g7+ observa

Ohin Illa Salomon realiza Eleisaun jerál, g7+ observa

Populasaun Illa Salomon entuziasmu tuir votasaun. Imajen Tatoli/Anito Soares

HONIARA, 17 abríl 2024 (TATOLI)-Nasaun Oseanu pasífiku Illa Solomon realiza, kuarta-ne’e, Eleisaun Jerál hodi hili líder foun ba mandatu tinan haat nian.

Eleisaun ne’e hanaran Join Election ka eleisaun konjunta  tanba kompostu husi Eleisaun ba Hili membru parlamentu, eleisaun ba hili Governu lokál provinsia nian, no eleisaun ba konsellu kapitál Honiara nian.

Atividade Sufrájiu universál Illa Salomon ne’e observa mós husi Organizasaun g7+, lideradu husi Xefe ekipa, Simon Sinai, atuál Prezidente Komisaun Nasionál (CNE), Papua Nova Guiné (PNG).

Urna votu ba eleisaun membru Parlamentu no Konsellu Munisipál Honiara

Xefe delegasaun observadór g7+ ba eleisaun jerál iha Illa Salomon, Simon Sinai, hateten, eleisaun ne’ebe hala’o iha Salomon la’o ho demokrátiku tebes, no bazea ba norma ne’ebé iha tuir observasaun pré-liminar, la iha irregularidade no sentru votasaun loke ho pontualidade; hahú loke tuku hitu dadeer, sidadaun sira entuaziasmu partisipa hodi hili líder ne’ebé sira fiar.

“Ohin ita hahú observa. Ita haree eleisaun hahú loke ho pontuál no eleisaun la’o ho di’ak, no demokrátiku tebes. Ita halo observasaun ba sentru votasaun lubun ida la’o di’ak. Prosesu servisu atendimentu ofisiál eleitorál atende ho di’ak no sidadaun sira satisfaz,” komisáriu eleitorál PNG ne’e hateten.

Autoridade másima órgaun eleitorál Papua Nova Guine ne’e afirma, observasaun eleisaun husi g7+ ba sentru votasaun iha kapitál Honiara iha parte  sentru nian, observa katak populasaun sira entuaziasmu partisipa hodi tuir votasaun ho hakmatek.

“Ohin ita haree fali iha sentru votasaun Honiara Higth School populasaun sira entuziasmu tebes partisipa. Hanesan ita haree, estasaun votasaun kuaze ema besik atus lima liu no mínimu mak ita haree atus tolu no populasaun hakmatek no kalma lao forma ba vota” Simon Sinai reitera.

Nune’e mós, Sekretáriu jerál g7+, Helder da Costa, hateten, populasaun  Illa Salomon  kumpri sira-nia direitu síviku hodi partisipa ativu hodi hili sira-nia lideransa tuir dalan demokrátiku, respeita regra ne’ebé eziste.

“Ekipa observadór eleisaun  g7+ mai iha illa Salomon kapitál Honiara, agora daudaun halo hela observasaun ba sentru votasaun. Ohin dadeer, ami mai tuku neen no sentru votasaun hahú loke tuku hitu. Ami halo observasaun sentru votasaun 10-resin. Ita haree enjerál  ema iha ne’e disiplina. Sira hatene di’ak liu sira-nia dever no direitu síviku hodi ezerse sira-nia votu iha urna,” Sekretáriu jeral g7+ haktuir.

Helder da Costa akresenta, maske udan maibé votante sira forma ho disiplina no pasiénsia no konsege to’o urna hodi ezerse direitu votu, no populasaun sira respeita duni demokrasia.

“Ohin maske udan maibé votante sira firmi nafatin forma ho disiplina no pasiénsia konsege ba to’o urna hodi ezerse votu, ida-ne’e mak ohin ita haree, no sira fó prioridade ba ema vulnerável, idozu, no mós grávida sira, ida-ne’e ami hare no ami bele hateten katak ema iha ne’e respeita duni demokrasia hala’o votasaun ho maneira pás, armonia no ordeira,” Sekretariu jerál g7+, Helder da Costa hatutan.

Sekretáriu jerál organizasaun intergovernamentál ne’e reforsa tan iha illa Salomon Poling staff la vota uluk no la rejistu no balun husi provinsia seluk, ho ida-ne’e diferente uituan ho Timor-Leste iha ne’ebé antes loke urna ba populasaun sira, ofisiál eleitorál tenke vota uluk.

Entertantu, Observadór g7+ fahe ba ekipa tolu hodi halo observasaun mak hanesan iha Honiara sentrál, observa husi Xefe delegasaun observadór g7+, Simon Sinai, no Sekretáriu jerál, Helder da Costa, iha sentru oeste, observa husi Diretór nasional Sekretariadu tékniku administrasaun eleitorál (STAE) Agustinho Cunha no Diretór operasaun g7+, Felix Piedade no iha parte Honiara leste observa husi Koordenadora media no komunikasaun g7+  Helche Silvestre no Agustinho Tavares no ekipa observadores tolu ne’e kobre sentru votasaun  besik tolu nulu resin.

Entertantu, eleisaun iha illa Salomon loke hahu tuku hitu dadeer no sei taka iha tuku tolu lorokraik oras Illa Salomon  nian.

Hafoin eleisaun sei lori urna konsentra hamutuk iha sentru munisípiu nian mak halo kontajen no sei la halo kontajen iha sentru votasaun sira.

Entuziasmu populasaun 

Populasaun illa Salomon entuziazmu partisipa hodi ezerse sira-nia direitu votu hodi hili líder ne’ebe sira hakarak hodi lidera sira-nia nasaun.

Tuir rezidente lokál, Wendy Hiele, iha kapitál Honiara, informa, sira partisipa hodi ezerse direitu votu hodi hili líder ne’ebé marka diferensa hosi lideransa anteriór hodi hala’o dezenvolvimentu ba sira-nia rai.

“Ami mai iha ne’e hodi tuir vota, ami hakarak hili lideransa ida ne’ebé halo diferensa, nune’e halo dezenvolvimentu ba ami-nia rai ami hein ida-ne’e” Rezidente lokál, Wendy Hiele, hateten.

Nune’e mós rezidente lokál, Timoty Hokorawa, espera ho votu ne’e nia fó sei deside governu ida mai ho vizaun di’ak hodi dezenvolve illa Salomon liuliu iha infrastrutura, ekonomia no seluktan.

“Ami espera liu husi eleisaun ne’e ami hili governu ida mai lori mudansa, liuliu hadi’a ami-nia estrada sira, harii ekonomia ida di’ak lori mudansa ba ami-nia nasaun,” Timoty espera.

Entertantu, komisaun eleitorál Illa Saloman rejistu votante hamutuk 422.917 no sira ne’ebé elijível vota hamutuk 420.253 husi númeru ne’e mane hamutuk 216.360 ho porsentu 52.48 no feto 203.893 ho porsentu 48.52.

Jornalista         : Anito Soares

Editór                : Rafael Ximenes de A. Belo

iklan
iklan

Leave a Reply

iklan
error: Content is protected !!