DILI, 17 abríl 2024 (TATOLI)–Sekretariadu Tékniku Administrasaun Eleitorál (STAE) hahú imprime buletin votu hodi prepara ba eleisaun suku 10, ne’ebé sei akontese iha loron 27 abríl 2024.
Aprezentasaun kandidatura iha loron 12 abríl, STAE hahú halo verifikasaun ba buletin votu iha loron 13 abríl no halo verifikasaun dezeñu inklui kolokoasaun buletin sira ne’e hotu hodi imprime buletin votu ba Xefe suku, Xefe aldeia, Delegadu/a, Reprezenta joven mane no feto iha loron 15 abríl 2024.
“Kaléndariu ba imprime buletin votu ne’e hahú iha loron 15 abríl to’o 21 abríl 2024, tempu ne’e sufisiente ona atu imprime, totál buletin votu ba Xefe suku hamutuk 35.997. Ida-ne’e ba ronde dahuluk nian, karik akontese suku balun tama ba ronde daruak mak ita halo kalkulasaun hodi imprime fali,” Diretór Jerál STAE, Elviro Fernandes Moniz, informa ba Agência Tatoli, iha ninia knaar fatin, Caicoli, kuarta ne’e.
Notísia relevante : Eleitór 33.176 husi suku 10 sei partisipa eleisaun iha fulan ne’e
Aleinde ne’e, ba Xefe aldeia to’o ronde daruak nian hamutuk buletin votu 63.735, ba Delegadu/a hamutuk 35.997, Reprezenta joven mane no feto hamutuk 1.000.
“Delegadu/a inklui Reprezentante joven prevee buletin ba ronde dahuluk nian de’it, enkuantu Xefe suku no Xefe aldeia ita prevee ba ronde daruak karik la atinje 50% mais votu ida, tenke akontese ronde daruak,” nia akresenta.
Ekipa responsável husi órgaun eleitorál sei distribui materiál sensitivu no naun sensitivu ba munisípiu haat, iha loron 22 abríl, nune’e hahú halo pakotementu no halo distribuisaun ba aldeia sira iha loron 26 abríl no eleisaun iha loron 27 abríl.
STAE kontinua halo preparasaun ba eleisaun suku 10 hanesan fó formasaun ba pesoál STAE hodi apoia aldeia sira inklui formasaun ba kandidatu membru meza hamutuk ema na’in-300
“Ita mós akredita ona observadór nasionál no internasionál provizóriu hamutuk na’in-20, nasionál 15 no internasionál na’in-lima,” Elviro tenik.
Jornalista : Arminda Fonseca
Editora : Julia Chatarina
