DILI, 18 abríl 2024 (TATOLI)–Diretór Jerál Rejistu Notariadu, João Fernando de Jesus Borges, hateten, atendimentu pasaporte iha Dili la’o normál, enkuantu iha munisípiu sira mak daudaun suspende.
“Loos duni katak ami momentu ne’ebá taka sai avizu hodi suspende atendimentu pasaporte, maibé ami foti sai tiha fali, ne’ebé atendimentu pasaporte la’o normál hela, katak loron-loron iha, munisípiu mak seidauk loke fali,” Diretór Jerál informa bainhira partisipa iha serimónia atribuisaun sertifikadu nasionalidade timoroan, iha Auditóriu Ministériu Justisa, Caicoli, kinta ne’e.
Notísia relevante : Ministériu Justisa aloka millaun $2 halo akizisaun mákina produsaun passaporte
Nia dehan, atendimentu la’o hela tanba stoke pasaporte sufisiente hodi atribui ba sidadaun sira ne’ebé presiza, enkuantu mákina impresora pasaporte daudaun ida de’it no di’ak hela, ne’ebé loron-loron halo imprensaun pasaporte.
Maski nune’e, Governu planeia ona hodi sosa tan mákina ne’ebé daudaun iha prosesu aprovizionamentu.
Antes ne’e, Diresaun fó sai ona avizu ba públiku kona-ba mekanizmu atendimentu pasaporte nune’e públiku hatene ona ninia prosesu, katak atendimentu tarde tanba hasoru hela problema mákina produsaun.
“Tanba ne’e mak halo ami tenke jere didi’ak para hotu-hotu bele tuir eskala prioridade, no grau urjénsia ne’ebé mak sira iha, tanba mákina produsaun ida de’it,” nia tenik.
Jornalista : Antónia Gusmão
Editora : Julia Chatarina
