BOBONARO, 18 abríl 2024 (TATOLI)-Diresaun Nasionál Transporte Terreste (DNTT) Delegasaun Territoriál Munisípiu Bobonaro, rekoilla ona orsamentu hamutuk rihun $45-resin, hodi kontribui ba kofre Estadu durante trimestre dahuluk 2024.
“Ita konsege kontribui reseita ho totál rihun $45-resin hosi atividade lisensa kondusaun, atendimentu lisensa kondusaun, rejistu veíkulu, inspesaun ba veíkulu no lisensa ba transporte, nune’e mós ba sira ne’ebé penór sira-nia dokumentu ba iha banku,” Diretór DNTT munisípiu Bobonaro, José Paulo Henriques Baptista, informa ba Jornalista sira iha ninia servisu fatin fatin,kinta ne’e.
Nia dehan, atu presta servisu hodi fó atendimentu di’ak liután ba públiku maka governu persiza kria kondisaun ba funsionáriu sira tanba oras ne’e daudaun DNTT munisípiu Bobonaro enfreta hela problema menus transporte, orsamentu no seluk tan.
“Ami-nia servisu normál hela, maske iha limitasaun no rekursu balun tanba delegasaun teritoriál ne’e ligadu ho administrasaun finansa ita hotu hatene buat hotu sentralizadu iha ministériu,” nia esplika.
Tuir nia, durante ne’e , DNTT delegasaun territoriál munisípiu Bobonaro mós fó atendimentu ba komunidade husi munisípiu Covalima, Liquiça no munisípiu sira seluk ne’ebé maka hakarak trata sira-nia dokumentu transporte no lisensa kondusaun.
Notísia Relevante:DTT Bobonaro rekolla reseita rihun $95-resin iha 2022
Jornalista: Sergio da Cruz
Editór: Agapito dos Santos
