DILI, 18 abríl 2024 (TATOLI) – Ekipa tékniku husi Komunidade Ko’alia Lian Portugés (CPLP-sigla portugés) hamutuk ema na’in rua iha ona Timor-Leste hodi observa direita fasilidade no kondisaun hotu Timor-Leste nian nune’e bele realiza jogu CPLP iha tinan oin.
“Ami mai atu observa situasaun no kondisaun Timor-Leste nian tanba tinan oin Timor-Leste mak sei sai uma na’in ba jogu CPLP. Iha ne’e sei observa ba kondisaun kampu sira, Ótel sira, fatin turizmu sira no buat seluk tan, antes nasaun ualu seluk mai partisipa jogu ne’e karik iha kondisaun ne’ebé di’ak,” Jorge Carvalho Koordenadór Desportu Konferénsia Ministru Juventude, Desportu CPLP ba jornalista sira iha edifísiu Ministériu Juventude, Desportu (MJDAK) Lecidere Dili, kinta ne’e.
Nia dehan, ekipa CPLP akompaña no fó apoiu másimu ba Timor-Leste atu sai uma-na’in ba jogu ne’e tanba nasaun membru sira hotu sai ona uma-na’in ba jogu ne’e só Timor-Leste mak seidauk.
“Ami haree Timor-Leste halo preparasaun sériu duni atu realiza jogu ne’e, tuir ami haree halo preparasaun iha Ótel, infraestrutura, ai-han ba atleta sira no ema ne’ebé atu mai ne’e bele han, transporte. Ami haree Governu só halo investimentu maka’as mak infraestrutura ba kampu jogu ba modalidade sira ne’ebé atu kompete,” nia tenik.
Iha okaziaun ne’e, membru komisaun tékniku jogu CPLP, António da Luz hatete, vizita ona kampu lubuk ida iha Dili no Munisípiu haree fatin di’ak atu realiza jogu ne’e iha tinan oin.
“Ami haree ona kampu lubuk ida iha Dili no Munisípiu, kona-ba fatin di’ak atu realiza jogu ne’e. Iha tinan oin Timor-Leste bele atu realiza jogu CPLP. Ita haree fatin sira hanesan kampu Glenu di’ak tebes, iha Dili fatin balun presiza hadi’a di’ak liutan,” nia katak.
Tuir nia, Timor-Leste nia fatin turizmu mesak furak hanesan foho ne’ebé matak no tasi-ibun ne’ebé kapas bele atrai ema hirak ne’ebé sei mai atu kompete jogu ne’e.
António da Luz hatutan, durante jogu ne’e oportunidade di’ak ba Timor-Leste tanba ema barak husi nasaun ualu mak sei mai no bele hatama mós osan ba Timor-Leste.
“Ema barak mak sei mai. Ida-ne’e oportunidade di’ak ida tanba sira bele lori mós osan mai hatama ba Timor-Leste,” nia tenik.
Rekorda fali katak, CPLP liuhusi konferénsia Ministériu Juventude no Desportu ba dala XIV, iha Luanda, hosi nasaun hamutuk sia aprova ho votu unaminidade ba proposta Timor-Leste nian ne’ebé husu atu sai uma-nain ba jogu CPLP iha 2025.
Kandidatura Timor-Leste nian hodi sai uma-na’in ne’e aprezenta direta husi Ministru MJDAK Nelyo lsaac Sarmento no hetan votu unamidade husi Nasaun membru sira hanesan Angola, Brazil, Cabo Verde, Guiné-Bissau, Guiné Equtorial, Moçambique, São Tomé e Principé no Portugal.
Hafoin deklara kandidatura, Diretór Nasionál Desportu MJDAK, Cesarino da Silva halo kedan aprezentasaun ba preparasaun téknika Timor- Leste nian, iha ne’ebé jogu ne’e sei iha kompetisaun ba modalidade sia mak hanesan, Atletizmu, Basketból 3×3, Voleiból Praia, Tenis Kampu, Futeból, Taekwondo, Karate-do no Xadres, inklui mós iha Atletizmu Paralímpiku.
Jogu CPLP ne’e sei implementa iha loron 17-27 jullu tinan 2025 ne’ebé sei kompete entre nasaun CPLP hotu.
Ho nune’e, Sekretáriu Estadu Juventude no Desportu Portugal, João Paulo Correia, iha konferénsia ne’e deklara katak Portugal sei fó apoia téknika ba Timor-Leste ba jogu desportiva ne’e.
Jornalista: Hortencio Sanchez
Editór: Rafael Ximenes de A. Belo
