VIQUEQUE, 18 abríl 2024 (TATOLI)—Estrada liga bá suku Bahatata, postu Uatucarbau, munisípiu Viqueque ho kondisaun a’at, nune’e difikulta movimentu abitante no transporte asesu bá merkadu iha postu Uatucarbau no merkadu postu Baguia.
“Ami-nia estrada liga bá suku Bahatata, daudaun ne’e ho kondisaun a’at totál. Nune’e mós kondisaun estrada bá Baguia a’at hotu, karreta fa’an sasán sira agora asesu ladi’ak, ne’ebé ami labele halo movimentu bá merkadu sira,” Xefe suku Bahatata, Patrício Maria Pinto, informa ba Agência Tatoli, iha postu Viqueque Vila, kinta ne’e.
Autoridade komunitária ne’e konta, iha tempu bailoro, movimentu transporte la’o bá-mai di’ak, maibé iha tempu udan hanesan daudaun ne’e susar.
“Estrada husi suku Bahatata to’o postu Uatucarbau purvolta kilómetru 21, dalan sira-ne’e maioria nakonu ho tahu hodi difikulta transporte sira asesu. Povu maioria moris husi vida agrikultór, tanba ne’e bainhira kondisaun dalan a’at, sira labele fa’an produtu lokál hodi sosa fali nesesidade bázika. Ita-nia povu hetan osan husi ne’ebé mak sosa sasán,” nia akresenta.
Notísia relevante : Empreza hahú mobiliza ekipamentu manutensaun estrada Viqueque Vila-suku Uma-Uain Leten
Kondisaun ne’e fó impaktu maka’as ba folin nesesidade bázika, hanesan foos kilograma 20 ho folin $18, foos kilograma 25 folin $20 (antes ne’e $15), mina litru lima folin $9 (antes ne’e $7) no balun fa’an $10, kafé kilograma 1 folin $1,50 (antes ne’e $0,75).
“Razaun folin sa’e tanba transporta sasán ho distánsia dook no estrada a’at,” Autoridade komunitária salienta.
Implementasaun PNDS paradu
Xefe suku Bahatata, Patrício Maria Pinto, relata, kondisaun estrada ida-ne’e mós fó impaktu ba implementasaun Programa Nasionál Dezenvolvimentu Suku (PNDS) iha suku Bahatata, ba konstrusaun eskola, dada bee-moos, Uma Naroma ba Povu (UNP) inklui morru protesaun ba postu saúde Bahatata.
“Distribuisaun materiál kontrusaun iha ami-nia suku paradu tanba kondisaun estrada, udan para estrada sira ne’e maran maka foin hahú filafali konstrusaun,” nia dehan.
Nune’e, Autoridade komunitária ne’e husu ba Governu sentrál hodi hadi’a estrada, atu nune’e labele bele ajuda abitante sira-nia atividade no labele impaktu ba infraestutura sira-ne’ebé implementa ona iha suku Bahatata.
“Ha’u hanoin Governu presiza aselera hadi’a infraestutura estrada. Iha fevereiru 2024, ha’u rasik mak konvida Vise-Ministru Obra Públika ho ekipa téknika sira halo observasaun direta ba kondisaun estrada husi suku Bahatata, nune’e sira promete katak iha agostu 2024 maka hadi’a, maibé agora ha’u la rona ona informasaun ruma. Karik to’o fulan-agostu maka seidauk hadi’a estrada, ami sei foti inisiativa ba hasoru Ministru Obra Públika,” nia hato’o.
Tuir dadus, abitante suku Bahatata hamutuk 921 husi uma-kain 201, kompostu husi aldeia haat hanesan Builakurae 202, Uai-Mare 337, Tata Dere 270 no Nelu-Uai 112.
Jornalista : Vitorino Lopes da Costa
Editora : Julia Chatarina
