iklan

HEADLINE, MUNISÍPIU, VIQUEQUE

KKM Viqueque define programa prioridade 12 foku ba setór saúde no agrikultura

KKM Viqueque define programa prioridade 12 foku ba setór saúde no agrikultura

Pesoál husi Diresaun Servisu PDIM halo aprezentasaun programa prioridade ba KKK, iha salaun administrasaun munisipál, kinta (18/04/2024). Imajen Tatoli/Vitorino Lopes da Costa

VIQUEQUE, 18 abríl 2024 (TATOLI)–Konsellu Konsultivu munisipál (KKM) Viqueque, kinta ne’e, diskute programa prioridade no define programa 12, ne’ebé foku ba setór prinsipál rua hanesan saúde no agrikultura.

Prezidente Autoridade munisípiu Viqueque, Francisco Cruz S. de G Soares, esplika, liuhusi enkontru ne’e, Diresaun Servisu Planeamentu Dezenvolvimentu Integradu Munisipál (PDIM) halo aprezentasaun kona-ba planu prioridade ba projetu ne’ebé sei ezekuta iha tempu badak nia laran. Nune’e, aprezenta programa prioridade ba Planu Integradu Munisipál (PIM) Viqueque bazeia ba proposta hamutuk 45, husi diretór kada diresaun no Administradór postu administrativu lima, ba tinan 2024-2025.

“Atu tau prioridade ba projetu ne’ebé ita sei ezekuta iha tempu badak nia-laran liuhusi PDIM aprezenta ona ninia planu lubuk ida, atu nune’e aban bain-rua ita bele utiliza iha períodu tinan-ida nia laran,” Autoridade munisipál ne’e hateten durante abertura enkontru KKM Viqueque.

Notísia relevante : PDIM Viqueque laiha pesoál enjeñeiru hodi kontrola kualidade projetu

Enkontru ne’e hamutuk  ho Sekretáriu munisipál sira hotu hodi deside atu implementa uluk planu prioridade ba projetu 12 tuir nesesidade ne’ebé nesesita ba komunidade lokál, liu-liu ba setór agrikultura no saúde.

“Tanba ne’e, nu’udar autoridade presiza haree hodi fó solusaun ba problema sira-ne’ebé povu enfrenta. Entaun, ita foti projetu prioridade 12 hanesan úniku solusaun. Tanba ne’e, nesesidade mais nesesita liu ba ita maka atu haree no sira-ne’ebé la liu, ita sei buka dalan seluk hodi rezolve,” nia akresenta.

Projetu prioridade kompostu husi konstrusaun irrigasaun We-Lafua (Dilór), reabitasaun Merkadu Olobay (Viqueque Vila), reabilitasaun Sentru Saúde (Irabin de Baixo Uatucarbau), perfurasaun bee-moos iha Buikarin (Bahalarauain), reabilitasaun irrigasaun ba natar Futudu Buanurac (Loihunu, Ossu), konstrusaun reabilitasaun dreinajen prinsipál iha suku Caraubalo, konstrusaun  Postu Saúde Beaço, reabilitasaun irrigasaun ba natar Fafulo-oan iha suku Luca, reabilitasaun Uma Maternidade iha postu Uatulari, inklui konstrusaun  no reabilitasaun irrigasaun Welaku (Bahalarauain).

Enkontru KKM Viqueque ne’e hetan partisipasaun husi Diretór Servisu Munisipál, Administradór postu lima, Xefe suku 36 inklui funsionáriu Diresaun Servisu PDIM munisípiu Viqueque.

Jornalista     : Vitorino Lopes da Costa

Editora          : Julia Chatarina

iklan
iklan

Leave a Reply

iklan
error: Content is protected !!