DILI, 17 abríl 2024 (TATOLI)–Ministéiru Edukasaun (ME) liuhusi Dirasaun Nasionál Rekursu Umanu daudaun ne´e halo hela normalizasau ba profesór sira-nia saláriu maibé osan la to´o, entaun ME hahú halo planu no proposta hodi propoin orsamentu ba kargu xefia sira iha tinan ne’e.
“Ami halo normalizasaun ona saláriu profesór, maibé osan mak la to’o entaun ami propoin tinan ne’e. Ne’ebé, agora ami planu halo proposta, nune’e ita bele selu tanba ne’e ema nia direitu. Agora ita iha dadus ona ba eskalaun no mós retroativu ba kargu diresaun, xefia no diretiva eskola ne’ebé seidauk selu, ne’ebé hahú hosi tinan kotuk to’o agora,” Diretora Nasionál Rekursu Umanu, Anita Tavares de Jesus, hateten ba Agência Tatoli iha nia kna’ar fatin, Vila Verde, kuarta ne’e.
Dadus eskalaun ema porvolta 2000-resin, agora ba ingresu sira-nian ba segunda faze iha ema hamutuk 600 hanesan ne’e mak seidauk selu.
Tanba ne’e, husu ba benefisiáriu sira atu hein tanba Ministériu Edukasaun presiza dadus mak foin bele selu, . Agora iha dadus ona maibé osan la to’o, entaun presiza planu proposta ida mak bele selu.
“Governu nafatin selu, labele hanoin dehan tinan kotuk ami asume kargu maibé tinan ne’e laiha, keta la hetan direitu ona karik, ida-ne’e laiha. Ami nafatin konsidera tanba dadus iha,” nia dehan.
Diretora Nasionál ne´e hateten, pagamentu progresaun eskalaun ba profesór tinan 2023 hamutuk 1.927 ne´ebé maihusi munisípiu Aileu 133, Ainaro 14, Baucau 459, Bobonaro 71, Covalima 326, Dili 244, Ermera 16, Liquiça 18, Lautém 270, Manatuto 161, Manufahi 59 no Viqueque 156.
Pagamentu progresaun eskalaun tinan 2022 hamutuk 2.306, kompostu hosi munisípiu Aileu 98, Ainaro 151, Baucau 380, Bobonaro 115, Covalima 73, Dili 306, Ermera 47, Liquiça 518, Lautém 308, Manatuto 94, Manufahi 113 no Viqueque 103.
Jornalista : Osória Marques
Editor : Cancio Ximenes
