VIQUEQUE, 19 abríl 2024 (TATOLI)–Administradór postu Lacluta, Pascoal Gama Martins, husu ba parte relevante hodi halo kontrusaun foun ponte Sumaku iha suku Uma-tolu, postu Lacluta, munisípiu Viqueque, nune’e bele dura ba tempu naruk.
Empreza Jamatil Unip Lda foin lalais normaliza ona ponte Sumaku ne’ebé kotu maibé udan-boot halo bee sa’e, estraga rai ne’ebé uza hodi normaliza ponte.
“Ponte Sumaku ne’ebé foin lalais kotu, ita halo ona normalizaun, maibé normaliza ne’e la metin tanba agora mota sobu fila. Ho preokupasaun ne’e, ha’u fó hatene ona ba Servisu Obra Públika hodi halo normalizasaun ponte atu labele difikulta beibeik ita-nia abitante sira, liu-liu bainhira transporta moras emerjénsia ruma bá Viqueque ne’e difísil tebes,” Pascol Gama Martins, hateten ba Agência Tatoli, iha Viqueque Vila, sesta ne’e.
Tanba ne’e, nia fó hanoin ba parte relevante sira labele halo normalizasaun beibeik, maibé presiza halo kontrusaun foun pante atu nune’e bainhira tempu udan, mota labele estraga no aterru mota tun lori filafali rai sira-ne’ebé uza aterru.
“Ami hanoin aterru ne’e la metin, ponte Sumaku presiza halo konstrusaun atu dura ba tempu naruk. Se ita normaliza, bainhira mota boot tun, sei sobu nafatin. Halo konstrusaun foun ne’e ha’u sente sei la kotu hanesan daudaun ne’e ami-nia povu enfrenta,” nia akresenta.
Notísia relevante : Ponte Sumaku iha postu Lacluta kotu tan tanba udan-boot
Iha sorin seluk, Diretór Servisu Obra Públika munisípiu Viqueque, Casildo Gomes Soares, informa, empreza hadi’a ponte ne’e iha semana kotuk.
“Sira destaka ekipamentu pezadu hanesan eskavatór hodi halo normalizasaun, maibé horiseik kotu filafali, nune’e ita sei halo koordenasaun nafatin hodi rezolve, maibé ba oin ita haree hodi halo konstrusaun,” Casildo dehan.
Ponte Sumaku hanesan dalan úniku ne’ebé ligasaun entre postu Lacluta no munisípiu Viqueque, ne’ebé laiha dalan alternativa ruma hodi asesu.
Xefe suku Dilor, Jacinto Ximenes, informa, transporte sira daudaun ne’e labele liu bá postu no munisípiu tanba ponte Sumaku kotu.
Postu Lacluta kompostu husi suku haat hanesan Uma-Tou, Dilór, Ahic no Laline, ho totál abitante 8.123, husi uma-kain 1.907.
Jornalista : Vitorino Lopes da Costa
Editora : Julia Chatarina
