DILI, 19 abríl 2024 (TATOLI)–Komisaun B ne’ebé trata asuntu Negósiu Estranjeiru, Defeza no Seguransa iha Parlamentu Nasionál (PN) husu Governu atu kontinua apoia fasilidade ba Unidade Polísia Marrítima (UPM) hodi halo kontrola di’ak liután ba kombate atividade peska ilegál iha tasi.
“Peska ilegál ne’ebé mak akontese iha rai-laran desde uluk kedas, Komisaun B sempre fó hanoin ba ministériu kompetente atu apoia fasilidade ba ita-nia seguransa sira, liu-liu ba iha Polísia Marrítima hodi bele halo kontrola di’ak liután,” Deputadu membru Komisaun B, Luís Roberto da Silva, hato’o iha resintu uma-fukun, sesta ne’e.
Notísia relevante : Timor-Leste lakon millaun $22 tanba peska ilegál
Durante ne’e, Komisaun B halo fiskalizasaun direta iha terrenu no haree fasilidade UPM hanesan ró atu halo kontrolu ba atividade peska ilegál ne’e menus tebes.
“Entaun, ema halo atividade peska ilegál iha kalan boot ruma mai to’o tasi klaran ne’ebá, ita-nia seguransa sira la halo buat ida tanba laiha fasilidade,” nia preokupa.
Nia nota mós katak kada tinan Timor-Leste lakon ikan barak iha tasi tanba atividade peska ilegál.
Enkuantu, prátika ne’e iha tasi Timor akontese kada tinan no atividade ida-ne’e fó prejuízu ba Estadu. Entre janeiru to’o dezembru 2023, país lakon ikan tonelada 1.020 ne’ebé konverte ba osan hamutuk millaun $22.
Tuir identifikasaun ne’ebé parte Autoridade Marrítima Nasionál (AMN) halo liuhusi open source satellite, ró hamutuk unidade 17 maka halo movimentasaun iha territóriu tasi Timor-Leste hodi halo atividade peska ilegál durante 2023.
Jornalista : Nelson de Sousa
Editora : Julia Chatarina
