COVALIMA, 19 Abríl 2024 (TATOLI) – Edifísiu Diresaun Transporte Komunikasaun (DTC) Covalima laiha kondisaun mínima ba funsionáriu sira atu halo atendimentu públiku, liuliu ba trata dokumentu sira tanba espasu la sufisiente.
Ministru Transporte no Komunikasaun (MTK), Miguel Manetelu, iha vizita traballu ba DTC Covalima hateten katak problema hanesan ne’e kuaze akontese hotu iha edifísiu sira iha munisípiu seluk.
“Ha’u hatene sira-nia kondisaun mínima tebes. Ha’u tama sira-nia fatin serbisu, dokumentu-sira rai iha sala no tau de’it iha rai”, governante ne’e dehan.
Ho kondisaun edifísiu DTC Covalima nian ne’ebé uza de’it sala rua ba halo serbisu, ministru halo kedan koordenasaun ho Prezidente Autoridade Munisipál Covalima, Miguel Armada Cardoso, atu haree hamutuk kestaun ne’e.
Governante ne’e dehan, autoridade Covalima iha nia planu oinsá halo preparasaun ba kámara munisipál hodi implementa dezentralizasaun no ba eleisaun kámara munisípal, tanba ne’e presiza iha kondisaun mínima atu tulun serbisu sira ho di’ak.
Aleinde vizita bá edifísiu DTC Covalima, governante ne’e mós observa aeroportu Suai hodi haree nia kondisaun liga ba prosesu sertifikasaun empreza sira ne’ebé serbisu iha área mina hakarak muda ba fatin ne’e.
Vizita ne’e halo husi ekipa Administrasaun Aeroportu no Navegasaun Aérea Timor-Leste, E.P. (ANATL, E.P), Autoridade Aviasaun Sivíl Timor-Leste (AACTL), Ajénsia Dezenvolvimentu Nasionál hodi haree kondisaun aeroportu Suai saida mak presiza atu kompleta, nune’e bele emite serfikadu.
“Vizita mós fronteira Mota-Masin, tanba ita hatene serbisu integradu finansa no transporte komunikasaun tau-matan ba karreta tama-sai, nune’e prepara diploma ruma atu regulariza kamionete ne’ebé tula sasán tama-sai”, nia informa.
Notísia relevante: DTC Covalima arrekada reseita rihun $24-resin
Jornalista: Celestina Teles
Editora: Maria Auxiliadora
