DILI, 19 abril 2024 (TATOLI)–Arsebispu Arkedioseze Metropolitana Dili, Dom Virgílio Kardeál do Carmo da Silva, SDB, hateten, eviksaun ne’ebé akontese ba populasaun iha Tasi- Tolu Dili la’ós tanba planu vizita Sua Santidade Papa Francisco nian mai Timor-Leste, maibé, ida ne’e programa Governu nian atu hala’o dezenvolvimentu durante sira-ninia mandatu tinan 5.
Dom Virgílio Kardeál do Carmo da Silva, SDB, hato’o asuntu ne’e, relasiona ho lamentasaun hosi komunidade lubuk ida hosi Tasi-Tolu ne’ebe iha kinta kalan ne’e, bá hasoru diretamente ho nia iha ninia residensia Lecidere Dili hodi hato’o sira-nia lamentasaun kona-ba desizaun Governu hodi hasai komunidade sira iha Tasi-Tolu.
Notísia Relevante :Governu autoriza despeza to’o millaun $12 ba preparasaun vizita Papa Francisco
“Uluk nana’in ha’u agradese , tanba ohin dader hetan klarifikasaun ida ne’ebé hakarak klarifika. mosu (informasaun) horikalan katak, tanba amu papa nia vizita mak obrigada atu halo eviksaun ba populasaun iha fatin Tasi-Tolu. Ida ne’e latemi tanba Amu Papa-nia vizita mak haruka halo eviksaun. Maibé, ida ne’e planu uluk ninian, ida ne’e mak ha’u hakarak klarifika. Ida ne’e kompetensia ida-idak nian,” nia hateten ba jornalista sira iha Motael Dili, sesta ne’e.
Lidér igreja katólika Dioseze Dili ne’e hateten nia parte simu preokupasaun barak hosi populasaun sira-nian maibé desizaun Governu nian.
“Ha’u rona no sei transmite ba ita-nia na’in ulun sira atu bele tetu liu-liu iha momentu sira ne’e hotu. Ita hotu rona, bainhira desizaun Governu sira-nian ba ita-nia povu sente hakmatek hodi simu desizaun saida de’it hosi Governu. Sira prontu naran katak fó tempu sira sai hosi ne’ebá,”Arsebispu afirma.
Arsebispu Arkedioseze Metropolitana Dili ne’e, hatutan mensajen hosi komunidade sira-nia katak prontu koopera ho Estadu no Governu atu halo dezenvolvimentu maibé, tenke fó tempu atu sira aruma sira-nia sasán antes halo eviksaun.
“Primeiru, nu’udar sidadaun Timor, ami hakruk no hatene katak ba Estadu ninian ami hotu prontu atu kopera no halo tuir hodi la’o tuir Estadu nia orientasaun. Maibé ami husu de’it atu fó tempu ba ami, tanba agora daudauk fó ami semana rua badak loos ba ami, tanba sa? tempu rai udan, iha semana rua laran ami laiha rendimentu atu hetan osan no sosa bu’at hotu atu bele sai husi ami-nia fatin hodi bele halo fali uma, muda sai husi ne’e afeta ba ami oan sira-nia eskola,” nia aprezenta.
Hatan ba asuntu ne’e, Ministru Administrasaun Estatál, Tomas do Rosário Cabrál, garante Governu sei tetu ko-naba razaun sira ne’ebé populasaun aprezenta liuhosi Arsebispu Arkedioseze Metropolitana Dili, Dom Virgílio Kardeál do Carmo da Silva, SDB, kinta kalan ne’e, iha Lecidere Dili.
“Ami ba rona sira, sei identifika ho posibilidade para nafatin halo espasu, hanesan Amu Bispu dehan ida ne’e identifika haree posibilidade para halo eviksaun to’o setembru. Se sira dehan semana rua la to’o, tanba sira fó razaun seluk, razaun sira ne’e ita tenki tetu,” Tomas do Rosário Cabral hateten.
Nia esplika Governu kontinua hadi’a kondisaun sira iha Tasi-Tolu “Se ita haree husi palku hateke tuun ba uma andar ida iha ne’ebá. Ida ne’e ita sei identifika família hira no oinsá bele ajuda tau sees sira iha fatin ida, ida ne’e mós ita konkorda,”Goverrnante ne’e tenik tan.
Notísia Relevante :IgrejaTimor hili tema “A vossa fé seja a vossa Cultura” durante vizita Amu Papa
Jornalista: Jesuína Xavier
Editor: Agapito dos Santos