OÉ-CUSSE, 19 Abríl 2024 (TATOLI) – Vice-Primeiru Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, no Ministériu Petróleu no Rekursu Minerál, Fransisco Monteiro, emite lisensa ba empreza Iron Fortune Pty Ltd. atu halo prospesaun no peskiza ba rekursu minerál metáliku iha Rejiaun Administrativa Espesiál Oé-Cusse Ambeno (RAEOA).
Vice-Primeiru Ministru, Mariano Assanami Sabino, hateten atividade peskiza ida ne’e sai hanesan istória foun ida tan ba Timor-Leste, espesiál ba povu Oé-Cusse tanba hafoin halo iha munisípiu seluk, ohin, realiza iha Oé-Cusse.
Tuir Assanami, Governu tau importánsia ba setór produtivu tolu atu dezenvolve mak hanesan petróleu no minerál, agrikultura, no turizmu. “Petróleu ne’e setór produtivu. Governu nia pozisaun fó apoia tomak depoizde Lei Mineiru ne’e iha no tempu badak sei halo esplorasaun no daudaun prospesaun no peskiza ne’e importante ba Oé-Cusse. Imi koopera, tanba ita-nia rikusoin iha imi-nia rai no iha imi-nia hela fatin”, nia husu.
Governante ne’e hato’o parabéns ba esforsu ne’ebé Ministériu Petróleu no Rekursu Minerál (MPRM) no Autoridade Nasionál Minerál (ANP) nu’udar reguladora konsege implementa ona polítika ne’e. Tanba ne’e, nia fó hanoin ba lia-na’in, xefe suku no xefe aldeia sira, ba autoridade RAEOA no ekipa Zona Espesiál Ekonomia Dezenvolvimentu Oé-Cusse Ambeno (ZEEDOA) atu kolabora atividade ne’ebé halo iha Oé-Cusse.
Ministériu Petróleu no Rekursu Minerál, Fransisco Monteiro, agradese ba apoia husi parte kompetene, tanba prosesu naruk to’o ohin loron entrega lisensa atu halo prospesaun ba rikusoin minerál metáliku iha Oé-Cusse.
“Ho investimentu ne’ebé kompañia halo iha ne’e, ho apoia entidade hotu rejionál no nasionál, ita hein katak tinan hirak mai bele deskobre, tanba iha ona indikasaun lubun kona-ba minerál”, dehan.
Tuir nia, emprezza sei aprofunda liután investigasaun sira-ne’e liuhusi teste oioin no ikus mai bele aserta loloos, katak rikusoin sira-ne’e sufisiente no ekonomikamente viavel atu dezenvolve.
“Ita espera, ho investimentu ne’e, sei kontribui ba dezenvolvimentu ekonómiku ita-nian, lori tan rendimentu mai ita-nia nasaun, nune’e bele sustenta ita-nia país, no bele mós kria postu traballu no atividade multiplikativa ba ekonómia nasionál”, nia espera.
Sekretáriu Rejionál ba Asuntu Administrasaun, André La’o, reprezenta Prezidente Autoridade RAEOA agradese ba Governu Sentrál tanba bele hili Oé-Cusse hodi halo prospesaun no peskiza ba minerál metáliku.
“Ami apresia tebes tanba foin primeira véz akontese iha Oé-Cusse. Ami hakfodak tanba Oé-Cusse mós iha rekursu minerál barak, tanba ne’e nu’udar autoridade hamutuk ho povu presiza kontribui”, nia garante.
Notísia relevante: Xanana lansa atribuisaun lisensa prospesaun no peskiza ba mineiru metáliku iha Lautem
Tuir dadus husi ANP, área ba atividade prospesaun no peskiza ba minerál metáliku iha Oé-Cusse iha rua, alvu mak sei kobre ouru ka osan-mean, manganés no osan-mutin.
Fatin dahuluk lokaliza iha sub-rejiaun Pante Makasar, iha suku Taiboko, aldeia Maquelab, Ulas, Nemun no Hauboni, no envolve mós sub-rejiaun Nítibe husi Suni-Ufe, aldeia Cabana, Fuabano no Oélcaem, suku Usitaku iha aldeia Nítibe no Kuantua, suku Lela-Ufe iha aldeia Hau-Ufe ho área konsesaun MEL2023-CA-ZG004.
Fatin daruak, iha sub-rejiaun Nítibe iha suku Ban-Afi, aldeia Kuanobe no Hau-Tefo, envolve mós sub-rejiaun Pássabe, iha suku Abani, aldeia Haemnanu, Pássabe no Naetuna, inklui sub-rejiaun Oésilo iha suku Bobometo, aldeia Quibiselo no Tumin, suku Usiataqueno, iha aldeia Nibin ho área konsesaun MEL-CA-ZG007.
Hola parte iha seremónia atribuisaun lisensa prospesaun no peskiza ba minerál metáliku ne’e xefe suku 18, xefe aldeia 63, membru autoridade RAEOA, veteranu, relijiozu , sosiedade sivíl no Prezidente empreza Murak Rai, EP, José Manuel Gonçalves, no Polísia Nasionál Timor-Leste, inklui abitante lokál sira.
Notísia relevante: MPRM atribui lisensa peskiza minerál metáliku iha Ossu ba empreza
Jornalista: Abílio Elo Nini
Editora: Maria Auxiliadora
