DILI, 19 abríl 2024 (TATOLI) – Diretór Jerál Desportu Ministeriu Juventude Desportu Arte no Kultura (MJDAK), João Rodrigues, hateten, Governu sei hadi’a fasilidade desportu lubuk ida nune’e bele realiza jogu CPLP ne’ebé mak sei akontese tinan oin no Timor-Leste mak sei sai hanesan uma-na’in.
“Ekipa tékniku sira mai ne’e haree ona fatin lubuk ida hanesan Jináziu Dili, Estádiu Munisipál Dili, kampo tenis, Estádiu Gleno no seluktan, sira husu ita atu hadi’a buat balu maibé kaman hela nune’e bele realiza jogu ho di’ak. Entaun ita nu’udar uma-na’in tenke hadi’a duni kondisaun sira,” Diretór ne’e hatete ba jornalista sira iha edifísiu MJDAK, Lecidere-Dili, sesta ne’e.
Diretór ne’e dehan, tuir ekipa tékniku nia observasaun Timor-Leste nia kondisaun priense hela kritéria, maibé presiza halo melloria tanba nasaun ualu ne’ebé atu mai la’ós de’it ba jogu iha mós turista lubuk ida ne’ebé hakarak mai haree Timor-Leste.
“Ita prontu ona atu sai uma-na’in ba jogu ida ne’e. Governu agora esforsu maka’as los atu halo preparasaun. Ita tama ona iha faze rekollamentu ba ita-nia fasilidade desportiva sira, ita-nia ekipa la’o hela sei aprezenta ba Ministru Juventude, Desportu, Arte no Kultura nia relata ba parte kompetente, ita sei rezolve ita-nia fasilidade sira. Ita nia kondisaun agora la aat liu maibé presiza mellora liután iha buat balun de’it. Hanesan iha Estádiu Gleno ita presiza hadi’a iha buat uitoan de’it mak loke tan fatin uitoan ba ekipa sira atu troka tanba agora ita-nia espasu ladun boot,” nia garante.
Alende haree fasilidade desportiva sira, ekipa mós halo observa ba fatin ne’ebé sei realiza mós atividade kulturál kada nasaun membru ida-ida ne’ebé sei hala’o iha Sentru Konvensaun Dili (CCD-sígla portugés).
“Sira ba haree ona CCD iha ne’ebá fatin ne’ebé apropriadu ba atu realiza animasaun no realiza eventu kulturál sira,” nia relata.
Iha parte seluk, husi jogu ne’e, turista barak konfirmadu ona atu mai vizita mós Timor-Leste liuhusi jogu ne’e no Governu prepara ona fatin importante tolu ba turista sira atu vizita mak hanesan, Cristo Rei, Estatua João Paulo II no Muzeun Rezisténsia.
“Entaun ekipa sei ba observa mós fatin turístiku tolu ne’ebé Governu define ona, sira ba ne’e atu observa kona-ba kondisaun iha fatin atu ema so’e foer ki’ik ho boot ka la’e, seguru ka la’e bainhira ema atu ba haree ne’e, ida ne’e mak ekipa sei ba observa,” nia tenik.
Orsamentu hotu ba jogu ne’e sei responsabiliza hosi Governu Timor-Leste, maibé seidauk hatene nia montante tanba tama iha orsamentu tinan-2025 nian.
“Jogu ne’e osan buat hotu ita mak tau, ita-nia responsabilidade mak akomodasaun, alimentasaun, transporte sira ne’e ita nian, ba sira ne’ebé mai ne’e sira responsabiliza mak viajen de’it,” nia katak.
Ekipa tékniku CPLP nian ema na’in rua mak agora iha ona Timor-Leste hodi halo observasaun ba fasilidade hotu Timor-Leste nian. Ekipa to’o Timor-Leste iha 16 abríl no sei fila fali ba Portugal iha 21 abríl semana ne’e.
Rekorda fali katak, CPLP liuhosi konferénsia Ministériu Juventude no Desportu ba dala XIV, iha Luanda, husi nasaun hamutuk sia aprova ho votu unaminidade ba proposta Timor-Leste nian ne’ebé husu atu sai uma-na’in ba jogu CPLP iha 2025.
Kandidatura Timor-Leste nian hodi sai uma-na’in ne’e aprezenta direta hosi Ministru MJDAK, Nelyo lsaac Sarmento no hetan votu unamidade husi Nasaun membru sira hanesan Angola, Brazil, Cabo Verde, Guiné-Bissau, Guiné Equtorial, Moçmbique, São Tomé e Principé no Portugal.
Hafoin deklara kandidatura, Diretór Nasionál Desportu MJDAK, Cesarino da Silva halo kedan aprezentasaun ba preparasaun téknika Timor-Leste nian, iha ne’ebé jogu ne’e sei iha kompetisaun ba modalidade sia mak hanesan, Atletizmu, Basketból 3×3, Voleiból Praia, Tenis Kampu, Futeból, Taekwondo, Karate-do no Xadres, inklui mós iha Atletizmu Paralímpiku.
Jogu CPLP ne’e sei implementa iha loron 17-27 jullu tinan 2025 ne’ebé sei kompete entre nasaun CPLP hotu.
Ho nune’e, Sekretáriu Estadu Juventude no Desportu Portugal, João Paulo Correia, iha konferénsia ne’e deklara katak Portugal sei fó apoia téknika ba Timor-Leste ba jogu desportiva ne’e.
Jornalista: Hortencio Sanchez
Editór: Rafael Ximenes de A. Belo
