DILI, 19 abríl 2024 (TATOLI)–Komisaun B ne’ebé trata asuntu Negósiu Estranjeiru no Defeza no Seguransa, iha Parlamentu Nasionál (PN), hahú halo audiénsia públika ho Ministériu Negósiu Estranjeiru no Kooperasaun (MNEK) ba projetu-lei númeru 7/VI (1a) kona-ba Prosedénsia no Protokolu Estadu.
“Ohin, Komisaun B audiénsia públika ho Ministériu Negósiu Estranjeiru no Kooperasaun atu rona pontu devista kona-ba projetu-lei Protokolu Estadu,” Prezidente Komisaun B, Augusto Domingos ‘Deker’, hateten hafoin audiénsia iha sala Komisaun, Parlamentu Nasionál, sesta ne’e.
Kontíudu husi projetu-lei maka atubele organiza protokolu Estadu trata instituisaun Estadu sira tuir nível ne’ebé mak iha.
Deputadu Deker dehan, Timor-Leste restaura ona ninia indepedénsia tinan 20-resin maibé seidauk iha lei Protokolu Estadu, nune’e importante tebes atu kria hamosu inisiativa ne’e.
Ho audiénsia públiku ne’e komisaun bele rona hanoin husi parte MNEK no sei konvida mós entidade relevante seluk hafoin komisaun sei hato’o ninia relatóriu paresér ba apresiasaun inisiál.
Notísia relevante : Semana oin, Komisaun B halo audiénsia públika ba projetu-lei Protokolu Estadu
Vise-Ministra ba asuntu ASEAN, Milena Rangel ninia hanoin kona-ba inisiativa lejislativa ne’e importante tebes, tanba Timor-Leste nu’udar nasaun soberanu, nune’e presiza duni iha lei Protokolu Estadu hodi nune’e bele atende serimónia boot ruma, liu-liu atende konvidadu espesiál husi nasaun seluk, no bele aplika iha serimonia Estadu no serimónia ofisiál ne’ebé mak hala’o iha rai-laran no ba misaun diplomátika sira iha rai-li’ur.
Nune’e, iha oportunidade di’ak ne’e MNEK bele halo konsultasaun no diskusaun ho Komisaun B ba projeitu-lei ne’ebé inisiativa ne’e mai husi deputadu sira.
Hafoin ne’e, MNEK sei filafali hodi haree prátika di’ak ruma ne’ebé mak ezise iha rejiaun atu lori fali mai iha Komisaun B atu enrikesa didi’ak projetu-lei ne’e, ne’ebé sei iha tempu tuir mai atu kontinua konsulta ho Komisaun B, molok tama ba diskusaun iha faze jerneralidade.
Komisaun rasik seidauk fó sai kona-ba projetu-lei Prosedénsia no Protokolu Estadu ninia kontíudu detallu ho artigu sira tanba sei halo uluk apresiasaun inisiál.
Jornalista : Nelson de Sousa
Editora : Julia Chatarina
