iklan

EDUKASAUN

ME distribui karteira eskolár 8000-resin ba eskola 100-resin iha semana oin

ME distribui karteira eskolár 8000-resin ba eskola 100-resin iha semana oin

Ekipa hosi Servisu Edukasaun Viqueque hahú distribui karteira eskolár ba eskola sira, sesta (30/09). Imajen Tatoli/Vitorino Lopes da Costa.

DILI, 19 abríl 2024 (TATOLI)—Diretór Nasionál Infraestrutura no Edukativu iha Ministériu Edukasaun(ME), Hélio Lopes, hateten semana oin Ministériu Edukasaun (ME) sei distribui karteira eskolár rihun 8-resin ba eskola 100-resin iha territóriu.

Notísia Relevante: Diretór EBC Manleu husu Governu presiza aumenta karteira eskolár

“Semana oin tan ita distribui karteira eskolár ba eskola sira 100-resin iha territóriu, ne´e sei distribui ba ensinu pre-eskolár to’o ensinu sekundáriu,” nia hateten ba Agência Tatoli iha kna’ar fatin, Villa Verde, sesta ne’e.

Daudaun ne’e, karteira eskolár iha armajén Ministériu Edukasaun (ME) nian, falta dokumentu balun ne’ebé mak tenke konklui maibé ida-ne’e iha ona diresaun lojistika nian no hein semana oin mai distribui de’it ona.

“Ami simu proposta barak hosi eskola sira-ne’ebé presiza maibé ida-ne’e ami haree ba dadus verifikasaun husi ME nian. Ida-ne´e, indika katak eskola balun presiza tebes kadeira ho meza no bele responde nesesidade kada eskola,” nia hateten.

Eskola bele halo jestaun, nia hateten, signifika kadeira ho meza ne’ebé iha bele uza tenke uza lai, atu labele hein de’it kadeira no meza foun ne’ebé mak mai. Tanba ne’e mak ministériu sei haree eskola ne’ebé mak presiza duni no eskola foun sira-ne’ebé mak ita sei ramata nia konstrusaun iha tempu badak ita sei distribui,” nia dehan.

Husi distribuisaun ne’e, eskola hotu-hotu tenke garante katak kadeira meza ne’ebé mak Ministériu fó tenke seguru no tenke hatene atu organiza kadeira meza hirak ne’e, bainhira fornese ona ba eskola sira-ne’ebé presiza.

“Ba tinan kotuk, ita aloka orsamentu $700.000. Ba tinan ne’e purvolta $900.000 para depois atu asegura hodi distribui nafatin ba iha saladeaula foun ne’ebé konstrui iha tinan ne’e iha tinan oin, nune’e mós ba eskola sira-ne’ebé menus kadeira meza,” nia hateten.

Karteira eskolar ne’e, sei distribui barak liu iha eskola ensinu báziku tanba estudante númeru ensinu báziku mak barak liu eskola ensinu sekundáriu no pre-eskolár sira.

“Tanba ne’e mak ita masimiza ita-nia prioridade sira-ne’e iha nivel ensinu báziku tantu infrastrutura no kadeira meza sira. Tanba, númeru estudante ensinu báziku ne’e kuaze rihun 200, entaun ita presiza kontinua fo apoiu materiál sira-ne’e, nune´e garante estudante hotu-hotu iha kondisaun ida-ne’ebé di’ak atu partisipa iha ensinu aprendizajen,” nia dehan.

Tinan ida-ne’e, Governu garante katak sei la rezolve hotu maibé pelumenus minimiza ona problema ida estudante sira laiha kadeira no meza ne´e.

“Ami garante katak ba oin estudante sira no ema hotu-hotu sei la kestiona kona-ba kadeira no mez. Karik, iha kazu ruma iha eskola ruma iha Timor laran ita identifika katak la iha kadeira ho meza, ita sei responde imediatamente. Ha’u hanoin la’ós ita rezolve 100% maibé pelumenus ita redús ona problema ida-ne’ebé kadeira-meza laiha ba estudante sira. Katak, kazu hirak ne’e neineik ba beibeik tinan lima ne’e Governu kompremitidu para rezolve situasaun ida kadeira meza ba estudante laiha,” bia dehan.

Ne’ebé, tuir nia, ba oin kadeira-meza ne´e ministériu identifika hodi responde, karik to’o tinan lima ne’e ramata no tinan sira tuir mai problema menus kadeira-meza ne’e la haree ona iha eskola sira iha Timor-Leste.

Entretantu, proposta ne’ebé ME simu hosi munisípiu hotu-hotu esklui RAEOA, hatama pedidu husu karteira eskolár rihun 40 ho númeru ne’e boot, entaun ME sei re-verifika took tanba iha eskola balun di’ak hela maibé lakohi uza no husu fali foun, iha fatin balun karteira eskolár iha maibé rai tiha fali.

Jornalista : Osória Marques

Editór         : Cancio Ximenes

iklan
iklan

Leave a Reply

iklan
error: Content is protected !!