Top

Meza PN ajenda votasaun finál globál alterasaun lei CAC iha semana oin

Uma Fukun Parlamentu Nasionál. Imajen Egas Cristovão

DILI, 19 abríl 2024 (TATOLI)—Meza Parlamentu Nasionál (PN), tau ona ajenda reuniaun plenária iha loron 22 abríl no sei halo diskusaun no votasaun finál globál ba proposta-lei númeru 6/VI(1a), alterasaun daruak lei númeru 8/2009, 15 jullu, lei kona-ba Komisaun Antí-Korrupsaun (CAC, sigla portugés).

“Ajenda reuniaun plenária segunda 22 abríl, períodu orden do dia, diskusaun no votasaun iha jeneralidade, iha espesialidade  no iha votasaun finál globál ba proposta-lei númeru 6/VI(1a), alterasaun daruak lei númeru 8/2009, 15 jullu, lei kona-ba Komisaun Antí-Korrupsaun,’’ haktuir, ajenda PN ne’ebé Agência Tatoli asesu, sesta ne’e.

Iha reuniaun plenária sei hahú diskusaun no votasaun dahuluk iha faze jeneralidade ne’ebé sei foka ba prinsípiu no sistema iha proposta-lei ne’e, ramata tiha kontinua kedas ba espesialidade ne’ebé foka espesífiku diskusaun no votasaun kada artigu ne’ebé Governu propoin atu altera iha lei vijente no hotu ida-ne’e tama kedas ba votasaun finál globál.

Bainhira aprova ona iha finál globál mak komisaun espesializada sei halo redasaun finál, hafoin Prezidente Parlamentu Nasionál mak sei envia proposta-lei ne’e ba Prezidente Repúblika mak iha kompeténsia eskluziva atu promulga.

Notísia Relevante : Komisaun A aprova relatóriu no paresér ba alterasaun lei CAC

Iha 17 abríl  2024, Komisaun A ne’ebé trata asuntu Justisa no Konstituisionál, halo aprovasaun relatóriu no paresér kona-ba proposta-lei númeru 6/VI(1a)-alterasaun daruak lei númeru 8/2009, 15 jullu, kona-ba lei CAC, nune’e Komisaun submete  ba meza PN hodi bele ajenda ba diskusaun  jeneralidade iha plenária.

Apresiasaun inisiál husi komisaun ba proposta-lei ne’e prienxe rekezitu atu bele halo alterasaun, nune’e bele diskute iha faze jeneralidade.

Relata mós komisaun nia audiénsia ho autór inisiativa lejizlativa husi parte Governu kona-ba perspetiva polítika atu halo alterasaun ba lei ne’e, ho ida-ne’e inisiativa ne’e merese duni hetan fatin no prienxe rekezitu konstituisionál no legál atu bele halo aprovasaun iha plenária.

Tuir Lei nú. 8/2009, 15 jullu, iha artigu 7 númeru 1 katak PN mak dezigna komisáriu CAC ho maiória absoluta, nune’e bainhira hetan prezensa husi pelu menus ¾ husi deputadu ho efetividade funsaun.

Iha alterasaun ne’ebé Governu propoin iha artigu 7° hodi dezigna komisáriu, ho artigu 11 hodi halo ezonerasaun ba komisáriu ho maioria absoluta de’it (Deputadu 33) hasai tiha ezijénsia prezensa ¾ ka husi deputadu na’in-49 ho efetividade funsaun.

Enkuantu, iha 12 abríl liubá, PN liuhusi reuniaun plenária estraordináriu, aprova pedidu urjénsia husi Governu ba diskute alterasaun daruak hosi lei númeru 8/2009, loron 15 jullu, kona-ba lei CAC.

Jornalista    : Nelson de Sousa

Editora         : Julia Chatarina  

Publisidade

Leave a Reply

Latest Post

error: Content is protected !!