HONIARA, 19 abríl 2024 (TATOLI) – Organizasaun g7+ liuhusi misaun Observatóriu Eleisaun iha país pasífiku, Illa Salomon, aprezenta rezultadu observasaun Eleisaun nian ba Komisaun nasionál Eleitorál, Illa Salomon, iha Otel Mindana, Kapitál Honiara, sesta ne’e.
g7+ hala’o misaun observatóriu iha estasaun votasaun nian iha konsellu Kapitál Honiara, hamutuk 21 kompostu husi Honiara sentrál 14, Honiara oeste rua no leste lima.
No, ekipa observadór ne’ebé destaka iha provinsia Guadalcanal estasaun votasaun hamutuk 24, kompostu husi parte norte, oeste, no sentrál provinsia Guadalcanal nian no ekipa observadór sira ba eleisaun iha fatin hirak ne’e la’o ho livre, pás no iha ambiente transparante.
Xefe delegasaun misaun observatóriu g7+ iha illa Salomon, Simon Sinai, atuál Prezidente CNE Papua Nova Guiné, iha ámbitu aprezentasaun relatóriu ne’e, iha Hotel Mindana, Kapitál Honiara, felisita povu Illa Salomon tanba ho vontade kontribui no partisipa ativa iha eleisaun pasífika no demokrátiku, iha loron 17 abríl, la’o ho seguru no hakmatek.
Tuir Simon Sinai, ekipa observadór observa iha lokál diferene, hatudu katak populasun sira livre tuir eleisaun no ofisiál eleitorál sira hala’o serbisu ho di’ak no la rejista insidente ruma durante atividade sufrájiu universál ne’e la’o.
“Ba dahuluk, kongratula ba órgaun eleitorál Illa Salomon nian ne’ebé organiza eleisaun ho di’ak, nune’e mós fó biban ba organizasaun g7+ hodi observa join election ka eleisaun konjunta ida-ne’e, iha misaun observasaun haree aplika duni tuir lala’ok demokrasia nian; populasaun partisipa ativu no livre,” Autoridade másimu eleitorál Papua Nova Guiné nian iha otel Mindana, Kapitál Honiara, Illa Salomon.
Nune’e mós Sekretariu jerál g7+, Helder da Costa, afirma, durante observasaun iha sentru votasaun sira kompostu husi estasaun vota 45 iha provinsia Guandacanal no Kapitál Honiara hatudu eleisaun enjerál la’o di’ak; hahú husi abertura, prosesu eleisaun to’o enseramentu no populasaun entuziasmu partisipa tuir dalan demokrátiku nian.
“Misaun observasaun g7+ iha fatin sira mak Kapitál Honiara, no Provinsia Guadacanal nian. Ita observa husi hahú abetura, prosesu realiza eleisaun to enserramentu ita haree la’o ho hakmatek populasaun partisipa ho entuziasmu ho liberdade pás no eleisaun hala’o ho tranparansia,” Sekretáriu jerál g7+ informa.
Helder da Costa énfaze, populasaun iha illa Salomon hahú husi kampaña eleitorál to’o eleisaun la provoka malu maske kampaña hamutuk no hakilar ba mai iha sidade Honiara maibé la hamosu violénsia ruma ho ida-ne’e Timor-Leste hanesan nasaun membru bele aprende no partilla esperiénsia ba malu.
“Hanesan ita haree iha kampaña ikus la iha violénsia no disturbu ba malu maske apoiante sira halo kampaña hamutuk iha sidade laran no movimentu hakilar ba mai, maibé la’o ho pás. Ne’e duni, fó lisaun ba ita oinsá ita bele partilla ba malu hanesan país membru g7+ nian,” superiór organizasaun intergovermentál ne’e.
Iha biban ne’e, Diretór nasionál Sekretáriadu tékniku administrasaun Eleitorál (STAE), Agostinho da Cunha ne’ebé hola parte iha ekipa misaun observasaun eleisaun konjunta iha Illa Salomon, afirma, eleisaun jerál ne’ebé realiza iha Illa Salomon ho Timor-Leste, la iha diferénsia maka’as maibé realizasaun eleisaun ba órgaun sira hanesan Eleisaun Prezidensiál, Parlamentar no suku ketak-ketak, maibé Illa Salomon halo dala ida de’it.
“Ein-prinsípiu eleisaun la iha diferénsia, diferensia de’it mak sira hala’o eleisaun dala ida deit ba órgaun Parlamentar, Governu lokál dala ida de’it. Iha Timor, ita-nian ketak-ketak nune’e mós iha lei eleitorál ne’ebé la limita sira-nia kampaña eleitorál di’ak mak sira-nia kampaña ne’e to kalan boot sira nunka sadik malu, provoka malu,” Diretór STAE ne’e kompara.
Ezekutivu órgaun eleitorál Timor-Leste ne’e hatutan, Timor-Leste ba futuru bele aprende mós husi Illa Salomon liu-liu iha prosesu realiza eleisaun ba órgaun sira oinsá bele sinkroniza dala ida de’it.
Entretantu, misaun observatóriu g7+ iha Illa Salomon ba eleisaun ne’e hala’o iha loron abríl ne’e fahe parte tolu mak hanesan iha Kapitál Honiara kobre parte Oeste, Leste, no Sentrál no iha Provinsia Guadalcanal kobre mós Norte, Oeste no Sentrál nian.
Jornalista : Anito Soares
Editór : Rafael Ximenes de A. Belo
