DILI, 19 abríl 2024 (TATOLI)–Primeiru-Ministru (PM), Kay Rala Xanana Gusmão, konvida péritu American Marine Biologist and Oceanographer, Sylvia Earle atu halo vizita mai Timor-Leste hodi fahe esperiénsia kona-ba biodiversidade tasi nian.
“Ha’u hasoru ho péritu Sylvia Earle, hosi American Marine Biologist and Oceanographer, Sylvia Earle, ne’ebé mundu tomak koñese no bolu nia hanesan Reinade Porfunidade, konvida nia hakarak ba to’o Timor hodi fahe esperiénsia balun husi nia hodi hato’o ba sosiedade atu iha ita hotu-hotu tenke iha konsiénsia atu kuidadu no proteje ita-nia tasi no labele estraga tasi, tanba tasi maka fó hahán no tasi maka fó oxijénia ba rai tomak,” Xefe Governu hateten liuhusi nota ne’ebé Agência Tatoli asesu, sesta ne’e.
Iha fatin hanesan, Sylvia Earle sente kontente tebes tanba bele hosoru malu ho PM Xanana hodi fahe esperiénsia ba malu.
“Ha’u kontente tebes bele hasoru malu hikas Primeiru-Ministru Xanana ho delegasaun Gabinete Fronteira Marrítima Timor-Leste iha ne’e (Grécia). Ha’u ho ekipa sei hala’o vizita bá Timor,” Sylvia kompromete.
Notísia relevante : Konferénsia Oseanu Grécia hametin kooperasaun hodi proteje balada iha tasi-laran
Iha ámbitu ne’e, Xanana Gusmão tara tais no entrega kafe Timor-Leste ba Sylvia Earle ho nia ekipa, ne’ebé tuir planu sei vizita Timor-Leste iha maiu 2024.
Sylvia Earle nu’udar belun di’ak ba PM Xanana ne’ebé koñese malu hodi fahe esperiénsia barak ba Timor-Leste kona-ba fronteira tasi no oinsá halo jestaun atu kuidadu ambiente tasi hodi fó moris ba balada no natureza sira ne’ebé moris iha tasi laran.
Sylvia Earle moris iha loron 30 agustu 1935 iha Gibbstown, New Jersey, nu’udar péritu biolojia kona-ba tasi nian ne’ebé koñesidu iha mundu no sai nu’udar feto dahuluk ne’ebé lidera Organizasaun Oseanografia no Atmosfer Nasionál ne’ebé durante ne’e fahe ona esperiénsia ba rai barak kona-ba konservasaun tasi.
Nia mós sai nu’udar feto dahuluk iha mundu ne’ebé halo estudu no peskiza oinsá luku ba tasi laran uza osijénia ne’ebé ohin loron ema iha mundu uza hodi luku ba tasi no halo dokumentasaun video no fotografia oin-oin kona-ba tasi no badala sira ne’ebé moris furak iha tasi laran.
Jornalista : Antónia Gusmão
Editora : Julia Chatarina
