DILI, 19 abríl 2024 (TATOLI)—Diretór Servisu Edukasaun Munisípiu Manatuto, Patrício da Cruz Quintão, hateten implementasaun projetu komunitáriu atu konstrusaun dapur Ensinu Báziku Sentrál (EBC-sigla portugés) hamutuk 18 iha Manatuto ne´e, to’o agora seidauk bele konstrui.
Notísia Relevante: Governu aloka millaun $3.6 implementa projetu komunitária-22 iha 2024
“Osan kuandu tama iha transferénsia públiku mak ita labele iha item ida ba konstrusaun nian iha ne’ebá. Ko’alia kona-ba konstrusaun mak osan tenke liuhusi kapital dezenvolvimentu. Tanba ne’e, ami sei halo aproximasaun ho ekipa jurídiku munisípiu Manatuto nian hodi haree no halo diskusaun ba asuntu ne’e, depois ita sei ba ko’alia ho Prezidente Autoridade. Se laiha solusaun nafatin mak Ministériu Edukasaun ho Ministériu Administrasaun Estatál mak sei hamutuk hodi deside,” nia dehan ba Agência Tatoli, hafoin partisipa lansamentu programa Edukasaun Multi Língua (EMuLi), iha salaun Ian Martin, INFPRDEPE, Balide, kinta ne’e.
Tanba, tuir nia, orsamentu prevee ona entaun oinsá mak konstrui ne’e presiza iha diskusaun koletiva ida, nune’e bele deside.
“Tanba, bainhira liuhusi kapitál dezenvolvimentu mak ita sei tama iha prosesu konkursu entaun ida-ne’e presiza tan kompañia. Ba ita sai kestaun ida mak ita-nia osan kiik hela, kompañia labele halo. Ita konfuzaun tanba osan prevee ona hamutuk ho merenda eskolár nian,” nia dehan.
Totál osan ba konstrusaun dapur 18 ne’e maihosi fundu transferénsia públiku hamutuk rihun $135 no kada dapur sei gasta $7.500.
Notísia Relevante: MEJD sei kontinua projetu komunitária 117 iha edukasaun pre-eskolár
Jornalista : Osória Marques
Editór : Cancio Ximenes
