DILI, 19 abríl 2024 (TATOLI)–Sekretaria Estadu Kooperativa (SEKoop) no Ajénsia Adventista Dezenvolvimentu no Asisténsia (ADRA, sigla inglés), sesta ne’e, selebra akordu kooperasaun serbisu hodi apoia formasaun ba grupu kooperativa sira.
Akordu ne’e asina husi Diretór Jerál SEKoop, Olderico Lopes no Diretora Ezekutiva ADRA, Virginia Pycroft, ne’ebé asiste hosi Sekretáriu Estadu Kooperativa, Arsénio Pereira da Silva.
Iha biban ne’e, Sekretáriu Estadu Arsénio Pereira, hateten, akordu entre parte rua hala’o ona desde tinan 2019, nune’e kontinua iha mandatu VIII Governu Konstitusionál, no daudaun renova hodi kontinua serbisu hamutuk.
“Akordu ne’e atu kesi parte rua, liu-liu iha serbisu saida de’it mak ita bele halo iha terrenu. Tanba objetivu finál maka atu hasa’e ekonomia povu nian, liu-liu ba ekonomia família. Ho parseria ADRA nian ne’ebé fasilita ona grupu liu-liu grupu agrikultór sira-ne’ebé agrupa nomós fasilita sira oinsá halo atividade ekonomia iha sira-nia fatin,”gevernante relata hafoin asiste asinatura akordu, iha Gabinete SEKoop, Akait.
Notísia relevante : SEKoop no parseiru dezenvolvimentu armoniza kooperasaun apoia grupu kooperativa
Governu apresia ho serbisu ADRA maibé fó hanoin mós katak atu labele hein sustentabilidade programa sira bainhira implementa iha Timor no depende de’it ba programa bainhira ramata laiha kontrolu, katak husik de’it no ema seluk mai halo fali buat foun.
“Atu kooperativa sira iha ninia sustentabilidade di’ak maka tenke kontinua no SEKoop prontu apoia,” nia akresenta.
Diretora Ezekutiva ADRA, Virginia Pycroft, reforsa katak Durante ne’e ADRA apoia kooperativa hamutuk 12 iha Viqueque, ho totál membru na’in-947, iha área oin-oin hanesan kooperativa mina-nu, rebosadu husi ai-lia, no kooperativa uniaun kréditu.
“ADRA iha kompromisu apoia grupu kooperativa sira liu-liu iha Viqueque ho intensaun asinatura akordu ne’e ADRA bele fornese formasaun no haforsa liután kooperativa sira ne’ebé ami estabelese ona desde tinan 2021,” nia tenik.
Diretora ezekutiva salienta, akordu kooperasaun ne’e hanesan kontinuasaun, signifika katak kapasitasaun ne’e importante tanba tinan hirak liubá grupu sira ne’e hetan ona apoia no ADRA kontinua de’it iha kapasitasaun rekursu hamutuk ho SEKoop.
ADRA foin apoia de’it kooperativa iha Viqueque, maibé daudaun foin atu apoia tan iha munisípiu Lauténm ho formasaun literasia finanseira ho negósiu hodi bele harii kooperativa.
Jornalista : Antónia Gusmão
Editora : Julia Chatarina
