DILI, 19 abríl 2024 (TATOLI)–Primeiru-Ministru (PM), Kay Rala Xanana Gusmão, akompaña husi Embaixadór Timor-Leste iha Brusselas, Jorge Trindade de Camões no ekipa Gabinete Fronteira Marrítima no Terrestre, hala’o enkontru ho Primeiru-Ministru Commonwealth of Dominica, Roosevelt Skerrit hodi ko’alia kona-ba kooperasaun bilaterál rai rua iha tempu besik.
Enkontru entre Xefe Governu rua ne’e akontese, hafoin partisipa abertura konferénsia Oseanu ‘Ita Nia Tasi’ ba dala-sia iha kapitál Atenas, Grécia.
Biban ne’e, Primeiru-Ministru Dominica, Roosevelt Skerrit, hato’o agradesimentu bele hasoru malu ho ninia omólogu iha konferénsia ne’e hodi aproveita deskute kooperasaun rai-rua nian.
“Primeiru-Ministru Xanana agradese tebes tanba ita-rua bele hasoru malu iha konferénsia ida-ne’e hodi fahe hanoin ba malu kona-ba Timor-Leste no Dominica sei bele sai parseiru iha futuru,” PM Dominica, Roosevelt Skerrit, hateten liuhosi nota ne’ebé Agência Tatoli, sesta ne’e.
Notísia relevante : Konferénsia Oseanu Grécia hametin kooperasaun hodi proteje balada iha tasi-laran
Iha fatin hanesan, PM Xanana mós agradese bele hasoru malu ho ninia omólogu hodi fahe hanoin ba malu kona-ba esperiénsia rai rua nian iha área polítika, ekonomia no asuntu prioridade seluk tan.
“Enkontru ho Primeiru-Ministru Roosevelt Skerrit sira hanesan Estadu foun no rai ki’ik hanesan ita. Nia husu atu iha relasaun diplomátiku hodi ita kontaktu ba malu ho sira bele estabelese kooperasaun ho Timor-Leste,” PM Xanana afirma.
Enkontru ne’e termina ho serimónia entrega prenda tasi no kafe Timor-Leste hodi Xefe Governu Xanana ba ninia belun di’ak nu’udar sinál agradesimentu hodi povu no nasaun Timor-Leste.
Iha parte seluk, PM Xanana hasoru malu mós ho Primeiru-Ministru, Republika Demokratika São Tomé e Príncipe, Patrice Emery Trovoada no Ministru Peska no Mariña Repúblika Namibia, Hon. Derek Klazen hodi fahe hanoin ba malu entre rai rua nu’udar nasaun ki’ik ne’ebé partisipa mós iha konferénsia Oseanu iha Atenas, Grécia hodi fahe sira-nia esperiénsia no rona esperénsia rai seluk nian.
Jornalista : Antónia Gusmão
Editora : Julia Charina
