iklan

EKONOMIA, COVALIMA, HEADLINE, MUNISÍPIU

MKI organiza feira promove produtu lokál iha Covalima

MKI organiza feira promove produtu lokál iha Covalima

Vise-Ministru Komérsiu no Indústria, Augusto Junior Trindade hamutuk ho Autoridade Covalima no entidade sira seluk halo vizita ba barraka feira nian ne’ebé aprezenta produ lokál oin-oin, iha Suai-Loro, sábadu (20/04/2024). Imajen Tatoli/Celestina Teles

COVALIMA, 20 abríl 2024 (TATOLI)—Ministériu Komérsiu no Indústria (MKI) organiza feira iha munisípiu Covalima ho tema nasionál‘ hamutuk ho dame promove produtu nasionál’, iha ámbitu komemora loron Restaurasaun Independénsia Timor-Leste ba dala-22 (20 maiu 2002 – 20 maiu 2024).

Vise-Ministru Komérsiu no Indústria, Augusto Junior Trindade hamutuk ho Autoridade Covalima halo abertura feira ne’e hanesan parte ida atu promove produtu lokál iha munisípiu Covalima.

“Populasaun entuziasmu partisipa feira ne’ebé organiza husi Ministériu Komérsiu Indústria, ita haree ema presiza animasaun no Governu nia prezensa oinsá ema hotu atu bele envolve iha prosesu konstrusaun Estadu,” Ministru hateten iha Suai-Loro, sábadu ne’e.

Notísia relevante : MCI loke feira produtu lokál no kalan kulturál iha Maliana

Atividade feira ne’e atu promove produtu lokál hanesan pateka, tomate, akar, no grupu sira halo diversifikasaun tais inklui kulinária uza marungi modifika sai dosi, bolu, sumu no seluk tan.

Atividade ne’e atu fó oportunidade mós ba feto sira atubele responde ba nesesidade populasaun, hanesan inan feto sira, grupu artezenatu, homan, no grupu joven inovativu halo negósiu.

Governante ne’e dehan, liuhusi atividade ne’e bele garante halo koneksaun ba merkadu nasionál, tanba ne’e tenke hasa’e kualidade no kuantidade produtu hodi ema sira iha interrese atu sosa.

“Ita haree hela oinsá atu ko’alia ho liña ministeriál, ami ho Ministériu Agrikultura, Peskúaria, Peska no Floresta  (MAPPF) nune’e agrikultór sira bele hasa’e produsaun ho kualidade. Ami iha obrigasaun halo ligasaun ba merkadu, nune’e kada tinan realiza atividade feira ne’e bele iha mundansa haree ba kapasidade inovasaun produtu lokál,” nia akresenta.

Orsamentu hodi realiza atividade feira hamutuk $700.000 ba feira durante loron-41, iha munisípiu 11 inklui Rejiaun Administrativa Espesiál Oé-cusse Ambeno  (RAEOA) loke feira durante loron-tolu, enkuantu iha munisípiu Dili loke feira durante loron-neen, hahú loron 15 to’o 20 maiu.

iha sorin seluk, Ministru Transporte no Komunikasaun, Miguel Marques Gonçalves Manetelu, hateten, nia prezensa iha atividade ne’e hodi fahe esperiénsia ba malu hodi bele lori Covalima ba oin.

“Ita hotu apresia ba inisiativa di’ak maski tempu-udan, bele nafatin hala’o atividade feira ne’e ho di’ak, joven sira presiza fó apoiu ba malu nune’e atividade la’o ho di’ak tanba Governu fasilita de’it,” nia tenik.

Nune’e mós, Sekretáriu munisipál asuntu Sosiál no Organizasaun, Filomeno Cardoso, husu ba negosiante iha barraka hamutuk 40 atu labele lakon oportunidade atu kompete ho xineza.

“Ita tenke nafatin luta atu halakon ai-han kímika ne’ebé afeta ba ema-nia saúde. Ita-nia produtu lokál no ai-han lokál ita prepara atu kompete iha merkadu nasionál no internasionál. Ita-boot sira nafatin mantein hodi prepara ai-han ho kualidade nune’e labele lakon oportunidade ho munisípiu sira seluk,” nia enkoraja.

Jornalista     : Celestina Teles

Editora          : Julia Chatarina

iklan
iklan

Leave a Reply

iklan
error: Content is protected !!