BOBONARO,19 abríl 2024 (TATOLI)-Vise Ministru Komérsiu Indústria (MCI), Agusto Juniór Trindade, kinta kalan ne’e, ofisiálmente halo abertura ko-naba feira nasionál no kalan kulturál iha postu administrativu Maliana, munisípiu Bobonaro.
Governante ne’e, dehan objetivu hosi feira produtu lokál no kalan kulturál ne’e hodi komemora aniversáriu restaurasaun independénsia Timor-Leste nian ba dala 22, ( 20 maiu 2002-20 maiu 2024) ho tema ‘Hamutuk ho dame promove produtu nasionais’.
“Ita presiza dignifika no valoriza ita-nia indústria sira ne’ebé agora la’o dadaun ne’ebé mak ita-nia inan-aman, ita-nia joven potensiál sira prepara daudaun iha Timor ita la’o tinan 21, ita la sadar tempu ne’e naruk loos ona, mais saida loos mak ita halo ona, kona-ba dezenvolvimentu ekonomia,buat balun ita bele hateten katak lori husi feira ne’e ita atu halo promosaun tanba ita iha buat balun ne’ebé ita prodúz iha rai-laran,” nia hateten durante halo abertura ba feira produtu lokál no kalan kulturál iha kampu futeból, maliana, kinta kalan ne’e.
Notísia Relevante:Komemora Loron Restaurasaun Independénsia MCI loke feira no noite kultura
Timor-Leste iha produtu lokál hanesan kafé orgániku, iha bee minerál ho marka Agua Leste, Freska, Gota, no ita iha produtu masin ne’ebé oras ne’e ita-nia populasaun sira prodúz iha aréa Atabae Bobonaro, Tibar Liquiça no iha Baucau, tanba ne’e Governu organiza feira ne’e hodi promove timor ninia produtu rasik.
“Ita-nia produtu sira ne’e konsege halo ona esportasaun dala ida maibé, agora mate laiha sustententabilidade entaun ho feira ida ne’e ita hakarak para oinsá atu promove fali, dada fali atensaun husi ita-nia ema, CCI-TL, setór privadu sira para oinsá sira hahú investe iha setór produtivu sira ne’ebé bele ajuda dezenvolve no diversifika ekonomia ba ita-nia kresimentu rai-laran,” nia hateten.
Atu apoiu dezenvolve ekonomia rai-laran, Timoroan persiza konsumu ninia produtu rasik, tanba oras ne’e, grupu koorativa ida prodúz ona xá ho kualidade di’ak, mina nú virjén, marmelada, saos tomate, vevidas alkóliku, no noun alkóliku ne’ebé sertifika ona katak iha duni kualidade atu sidadaun sira bele konsumu.
“Liuhosi feira ida ne’e ita atu halo kampania nasionál ida oinsá ita hotu-hotu hadomi no konsumu ita-nia produtu rasik neineik-neneik sei espanda ba to’o merkadu ne’e ua’inhira ita hotu-hotu komesa sente ho orgullu konsumu ita-nia produtu sira,” tenik tan.
Iha tempu hanesan, Prezidente Autoridade Munisípiu Bobonaro, Alexandre Pires, louva ho programa governu ne’e no konsidera feira produtu lokál importante ba povu atu promove sira-ninia produtu lokál.
“Ministériu hadomi ita lori eventu ida ne’e mai, ha’u konvida inan-aman sira hotu bele hakat mai lori aproveita sasán folin baratu no imi bele promove imi-nia produtu lokál liu hosi imi-nia kreatividade rasik,” Autoridade Munisípiu Bobonaro ne’e hateten.
Atu garante nafatin estabilidade durante feira produtu lokál no kalan kulturál ne’e, ne’e Alexandre Pires, apela ba komunidade hotu liu-liu Joven sira atu partisipa iha feira ne’e ho ambiente Paz no hakmatek.
“Seguransa la’ós iha PNTL ho F-FDTL,seguransa iha povu Bobonaro nia liman hotu, ita mak bele dehan ita hakmatek,ita mak bele dehan páz,laiha iha ema ida mak lori páz mai ita no laiha ema ida lori hakmatek mai ita, so ita Bobonaro tenke kria páz no hakmatek,”Alexandre hatutan.
Enkuantu, atividade feira produtu lokál no kalan kulturál ne’e hala’o durante loron tolu hahú ona iha loron 18 to’o 20 fulan-abríl 2024.
Tuir oráriu feira produtu lokál no kalan kulturál ne’e, hala’o iha munisípiu 13 inklui RAEOA, mak Munisípiu Bobonaro no Baucau iha loron 18-20 abríl, Lautem no Covalima iha 19-21 abríl, Manufahi no Ermera iha 25-27 abríl, Ainaro no Liquiça iha 2-4 maiu, Manatutu iha 3-5 maiu, Viqueque no Aileu iha 9-11 maiu, RAEOA iha 10-12 maiu no Dili iha 15-20 maiu,” nia subliña.
Orsamentu ne’ebé Governu prevee hodi loke feira ida-ne’e hamutuk $700,000 ba atividade tomak iha territóriu nasionál.
Governu Konstituisionál liuhosi despaixu Primeiru-Minsitru nian, númeru 023/GPM/III/2024 ho títulu organizasaun ba selebrasaun ba tinan XXII ba Restaurasaun Independénsia hanesan momentu importante hodi dignifika no valoriza prinsípiu sira ne’ebé mak orienta nasaun no povu hodi kontribui ba forma sentidu uniaun ba timoroan tomak.
Notísia Relevante:MCI enkoraja joven emprezariál kontinua kontribui dezenvolvimentu ekonómiku
Jornalista: Sergio da Cruz
Editor: Agapito dos Santos
