Komemora Loron Restaurasaun Independénsia MCI loke feira no noite kultura
DILI, 16 abríl 2024 (TATOLI) – Ministériu Komérsiu no Indústria (MCI) loke feira no noite kultura liuhosi promove produtu lokál, promosaun produtu industriál nasionál no divertimentu múzika iha Timor-Leste. Programa ida-ne’e ho objetivu atu Komemora Loron Restaurasaun Independénsia 20 maiu.
“Atu komemora loron 20 maiu ba dala XXII iha ita-nia rain mak MCI fó sai ba públiku katak preparativu ba ita-nia atividade feira no noite kultura iha TL la’o di’ak”, Vise Ministru Komérsiu no Indústria Agusto Junior Trindade, informa bainhira hala’o konferénsia imprensa iha Portu Dili, ohin.
Tuir oráriu ba lokalizasaun ba atividade iha munisípiu 13 inklui RAEOA, mak Munisípiu Bobonaro no Buacau iha loron 18-20 abríl, Lautem no Covalima iha 19-21 abríl, Manufahi no Ermera iha 25-27 abríl, Ainaro no Liquiça iha 2-4 maiu, Manatutu iha 3-5 maiu, Viqueque no Aileu iha 9-11 maiu, RAEOA iha 10-12 maiu no Dili iha 15-20 maiu”, nia subliña.
Tanba ne’e, nia informa ba timoroan tomak katak selebrasaun ida-ne’e sei iha divertimentu no noite kultura no sei anima husi artista timoroan, tantu munisípiu no mós nasionál.
“Ami husu ba entidade tomak, ba ita-nia maluk sira ne’ebé mak prepara halo atividade negósiu no indústria sira bele mai rejistu atu bele partisipa iha feira ida-ne’e. Tanba iha munisípiu ita prepara tenda hamutuk 40 to’o 60 atu atrai ita-nia produtu no indústria sira atu partisipa iha ne’eba, iha nasionál ita prepara 150 tenda ba produtu arte zenato, restaurante no mós Ministériu ne’ebé mak atu halo promosaun ba sira-nia atividade ministériu, tanba ita servsiu hamutuk ho CCI-TL no mikro pequena sira atu mai partisipa iha feira ida-ne’e”, nia relata.
Diretór Jerál koorporativa no Koordenadór Jerál Feira, iha Ministériu Komérsiu no Indústria (MCI), Leonardo de Carvalho, informa faze preparasaun iha munisípiu mak MCI halo ona koordenasaun no enkontru ho prezidente autoridade munisípiu hotu atu hala’o feira ida-ne’e.
“Ami enkontru ona ho Prezidente Autoridade Munisípiu sira, entaun persentajen ba atinjimentu to’o ona 85%, agora ba munisípiu haat ne’ebé mak ami atu realiza uluk mak Buacau, Bobonaro, Covalima no Lautem, nia preparasaun daudaun ne’e 95% hein de’it mobilizasaun iha terenu”, Leonardo de Carvalho esplika.
Orsamentu ne’ebé Governu prevee hodi loke feira ida-ne’e hamutuk $700,000 ba atividade tomak iha territóriu nasionál.
Governu Konstituisionál liuhosi despaixu Primeiru-Minsitru nian, númeru 023/GPM/III/2024 ho títulu organizasaun ba selebrasaun ba tinan XXII ba Restaurasaun Independénsia hanesan momentu importante hodi dignifika no valoriza prinsípiu sira ne’ebé mak orienta nasaun no povu hodi kontribui ba forma sentidu uniaun ba timoroan tomak.
Jornalista : Felicidade Ximenes
Editór : Zezito Silva
