ERMERA, 19 abríl 2024 (TATOLI)—Xefe Suku Fatuquero, Leoncia Trindade, husu grupu Forum Juventude Defísiénsia Ermera (FJDE) atu bele rejista ho legalmente iha Sentru Solidaridade Sosial Muniíipiu Ermera hodi bele hetan apoiu ruma.
Notísia Relevante: Mídia Tour 2024 sei haforsa foin-sa’e Ermera nia lian
Nia rekoñese ba difikuldade FJDE hasoru iha baze no prontu atu fasilita nafatin FJDE ne’ebé hala’o hela sira-nia atividade hortikultura no produsaun kafe uut ne’ebé seidauk hetan tulun husi Governu liuhusi sentru solidariedade sosiál.
“Ha’u prontu atu halo deklarasaun no karta akompañamentu ba sira atu lori ba sentru solidariedade sosiál atu hetan rekoñesimentu hodi tulun apoiu grupu ema ho defisiénsia naran FJDE. Ha’u la presiza ha’u-nia komunidade mai buka ha’u to’o iha suku, bainhira presiza bele liuhosi telefone de´it,” nia hateten ba jornalista sira-ne´ebé hala’o Mídia Tour 2024 ba vizita munisípiu Ermera, iha sede suku Fatuquero, kinta ne’e.
Iha mandatu durante tinan hitu ne´e, nia hakarak de’it mak dezenvolvimentu iha suku Fatuquero no nakloke ba sé de’it atu lori dezenvolvimentu. Suku Fatuquero iha totál populasaun hamutuk 2,458 no rejista ema ho defisiénsia 48, maibé 29 mak rejistadu ona iha MSSI tanba kompleta ona dokumentu.
Koordenador grupu Forum Juventude Defísiénsia Ermera (FJDE), Marcos de Deus Martins, hateten maske FJDE ezijeste ona husi 2019 maibé seidauk hetan atensaun másimu husi Governu liuliu MAPPF no MSSI hodi tulun nia atividade sira.
“Presiza ekipamentu no fatin rasik. Ami hanoin atu hadi’a ami-nia fatin maibé kbiit la to’o. Karik Governu iha posibilidade hodi apoiu ami, ami mós hakarak hetan kapasitasaun liliu ba membru sira hodi hasa’e sira-nia abilidade no kapasidade liuliu ba área agrikultura nian,” nia hateten.
Responsável Raes Hadomi Timor Oan (RHTO) munisípiu Ermera, Joanico Pereira dos Santos hateten RHTO mós fasilita ema ho defisiensia liga ba orsamentu sira-ne’ebé mak inisitivu ba eskola sira husi ensinu pre-primariu to’o ensinu sekundariu nomós ensinu superiór ka universidade.
“Husi apoiu ne’ebé ami iha natoon de’it ba sira-nia nesesidade, atu nune’e sira ramata estudu iha universidade, sira fila mai implementa mós atividade sira hanesan agrikultura, ortikultura, loke negósiu kiik sira hanesan loke kioske, atu nune’e sira bele buka moris rasik no labele dependente ba ema seluk. Grupu FJDE hamriik husi RHTO, se RHTO laiha munisipiu mak nia sei la hamriik,” nia dehan.
Kona-ba ortikultura, nia dehan, RHTO seidauk iha apoiu maibé fasilita de’it informasaun kona-ba oinsá mak sira bele kria rasik sira-nia grupu, atu nune’e labele dependente ba ema seluk tanba ema ho defisiénsia mós bele halo ona sira-nia atividade rasik.
Diretor Sentru Solidaridade Sosiál Munisipiu Ermera, Vito Caio do Santos, hateten apoiu ne’ebé MSSI oferese ba ema ho defisiénsia no vunerável sira-ne´e, hare’e de´it ba aihan nutritivu no la’ós nutritivu bazeia ba orsamentu husi MSSI nasionál, liuliu ba ema ho defisiénsia 2000-rein ne’ebé rejistadu ona iha Ermera.
Jornalista : Cidalia Fátima
Editór : Cancio Ximenes
