iklan

EDUKASAUN, HEADLINE

Aplikante 3.491 aplika vaga bolsa estudu husi MAKLN

Aplikante 3.491 aplika vaga bolsa estudu husi MAKLN

Xefe Departamentu Baze Dadus MAKLN, Mário da Silva Pereira. Imajen Tatoli/Francisco Sony

DILI, 22 abríl 2024 (TATOLI)–Ekipa téknika husi Ministériu Asuntu Kombatente Libertasaun Nasionál (MAKLN) rekolla dadus aplikante hamutuk 3.491 aplika ba vaga bolsa estudu vateranu no mártir nia oan sira.

Ekipa nasionál desloka bá munisípiu sira, hamutuk ho Konsellu Veteranu husi munisípiu hodi halo atendimentu rejistu ba aplikante sira ne’ebé aplika bolsa estudu, ne’ebé asesu edukasaun hahú husi ensinu báziku to’o ensinu superiór.

“Ami halo atendimentu rejistu ba aplikante sira hahú loron 05 marsu no ramata iha 03 abríl 2024. Tuir planu tinan ne’e ita sei simu bolseiru hamutuk 1.300, maibé daudaun dadus aplikante ne’ebé ami rekolla hamutuk 3.491,” Xefe Departamentu Baze Dadus MAKNLN, Mário da Silva Pereira, informa ba Agência Tatoli, iha ninia knaar fatin, Caicoli, segunda ne’e.

Ekipa halo hela verifikasaun dokumentu atu haree aplikante sira-nia naturalidade inklui komprimentu ba kritériu, nune’e hafoin ne’e sei hatama dadus ba sistema dijitalizasaun eletróniku.

“Kona-ba atu anúnsiu rezultadu sé mak liu no la liu, ita seidauk bele fó sai tanba ekipa halo verifikasaun ne’e lubuk ida hahú hosi dokumentu haree husi nota ka valór eskola nian no kritériu sira hotu ita sei manda aplikante sira-nia naran hodi halo konfirmasaun mós ba Ministériu Solidaridade Sosiál no Inkluzaun (MSSI), Fundu Kapitál Dezenvolvimentu Umanu (FDCH, sigla portugés) inklui verifika estudante sira,” nia akresenta.

Notísia relevante : 2024: MACLN atribui bolsa estudu ba veteranu nia oan 1.300

Objetivu aplikante sira-nia naran tenke haruka ba instituisaun relevante ne’e hodi konfirma karik antes ne’e estudante sira hetan ona bolsa estudu ona labele hetan dupla tan husi MAKLN.

“Bazeia ba regulamentu, ema ne’ebé hetan ona bolsa estudu labele hetan tan, ne’ebé ita atu fó sai rezultadu bainhira laiha reklamasaun ruma ba aplikante sira ne’e presiza fulan-rua ka tolu ita sei taka naran no halo pagamentu tanba ita sei haree didi’ak aplikante 1.491 ne’e no ikus mai tenke to’o de’it 1.300,” nia esplika.

MAKLN tinan ne’e prevee orsamentu $1.127.750 ba bolsa estudu. Atribuisaun bolsa estudu ba veteranu nia oan ne’e ba kada tinan, bazeia ba rejime atribuisaun bolsa estudu ba veteranu mártir libertasaun nasionál nia oan, nune’e iha tinan letivu ne’e, MAKLN hasai ona despaisu númeru 02/MACLN-IXGC/1/2024 neʼebé hatuur kedas númeru ba vaga sira ne’ebé hakerek iha númeru 2 husi despaisu ne’e bazeia ba nível ensinu sira.

Bolsa estudu ne’ebé atribui ba estudante husi ensinu báziku to’o ensinu superiór, kompostu husi ensinu báziku siklu 1º hamutuk 65 kada munisípiu ema na’in-lima, ensinu báziku siklu 2º no 3º hamutuk 195 kada munisípiu ema na’in-15, ensinu sekudáriu hamutuk 325 kada munisípiu na’in-25, ensinu superiór univerisitáriu Timor-Leste hamutuk 350 kada munisípiu ema na’in-50 no ensinu superiór iha rai-li’ur na’in-65 kada munisípiu na’in-lima.

Ba ensinu báziku siklu 1º kada bolseiru sei hetan osan ho montante $300, ensinu báziku siklu 2º no 3º hetan $600, ensinu sekundária hetan $650, ensinu superiór Univerisitáriu Timor-Leste hetan $1.000 no ensinu superiór rai-li’ur hetan $2.000.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!